సర్దార్ హిందీ ఆడియో గెస్ట్‌ ఎవరో??

పవర్ స్టార్ పవన్ కళ్యాణ్ నటించిన సర్దార్ గబ్బర్ సింగ్ తెలుగు వెర్షన్ ఆడియో ఫంక్షన్ అంగరంగ వైభవంగా జరిగింది. మెగాస్టార్ చిరంజీవి చీఫ్ గెస్ట్ గా రావడం.. తమ్ముడితో తన అనుబంధాన్ని పంచుకోవడంతో పాటు.. చిరు - పవన్ లు సెల్ఫీ తీసుకోవడం వంటి అపురూపమైన క్షణాలు ఎన్నో.. ఫ్యాన్స్ మదిలో నిలిచిపోయాయి. సర్దార్ గబ్బర్ సింగ్ తెలుగుతో పాటే.. అదే రోజున హిందీ వెర్షన్ కూడా విడుదల కానుంది.

ఈ మూవీకి సంబంధించి ఆడియో రికార్డింగుల కోసం మ్యూజిక్ డైరెక్టర్ దేవిశ్రీ ప్రసాద్ ముంబైలో మకాం వేశాడు. టాప్ సింగర్స్ తో పాటలు పాడించి రికార్డింగ్ చేయిస్తున్నాడు. డబ్బింగ్ వెర్షన్ అనిపించకుండా.. ఈ పాటలు ఉండేట్లుగా జాగ్రత్తలు తీసుకుంటున్నారని తెలుస్తోంది. మరి కొన్ని రోజుల్లోనే హిందీ ఆడియో కూడా రెడీ అయిపోతుందని సమాచారం. సర్దార్ హిందీ ఆల్బం పూర్తిగా సిద్ధం కాగానే.. ముంబైలో భారీ ఎత్తున దీని లాంఛింగ్ కార్యక్రమం ఏర్పాటు చేసేందుకు నిర్మాణ సంస్థ ఈరోస్ ఇంటర్నేషనల్ సిద్ధం అవుతోంది. అయితే సర్దార్ గబ్బర్ సింగ్ హిందీ ఆడియోకు చీఫ్ గెస్ట్ గా ఎవరు రానున్నారనే ఆసక్తి నెలకొంది.

హీరో హీరోయిన్స్ గా పవన్ కళ్యాణ్ - కాజల్ ఎలాగూ అటెండ్ అవుతారు. బాలీవుడ్ ఖాన్ త్రయంలో ఎవరో ఒకరిని సర్దార్ హిందీ ఆడియో లాంఛింగ్ కు పిలవనున్నారని తెలుస్తోంది. మెగా ఫ్యామిలీతో ఉన్న సాన్నిహిత్యం ప్రకారం సల్మాన్ ఖాన్ వచ్చే అవకాశాలు ఎక్కువగా ఉన్నాయని టాక్.