ధూమ్ 4 కి మనోడు హ్యాండిచ్చేశాడా?

ఇండియన్ మూవీస్ లో సిరీస్ గా వచ్చి సూపర్ సక్సెస్ లు సాధించిన సినిమాల సంఖ్య తక్కువే. గ్రాండ్ సక్సెస్ ఆ కొద్ది వాటిలో ధూమ్ ఒకటి. ధూమ్ నుంచి ధూమ్ 3 వరకూ ప్రతీ సినిమా దేనికదే స్పెషల్. అన్నీ దొంగతనాలు.. హీరో-విలన్ ఛేజింగ్ కాన్సెప్ట్ తోనే సాగినా.. ఈ సిరీస్ లో విలన్ కే ఎక్కువ పేరొచ్చిన సంగతి మర్చిపోకూడదు. ధూమ్ లో జాన్ అబ్రహాం.. ధూమ్ 2 లో హృతిక్ రోషన్.. ధూమ్ 3లో అమీర్ ఖాన్ లు.. నెగిటివ్ రోల్స్ లో చేసి మెప్పించారు.

ప్రస్తుతం ధూమ్ 4కి సంబంధించిన ఏర్పాట్లు జరుగుతున్నాయి. ఈ మూవీలో విలన్ పాత్రకు సల్మాన్ ఖాన్ ను ఎంపిక చేశారనే టాక్ చాలాకాలం గానే నడుస్తోంది. మరి సల్మాన్ విలన్ రోల్ లో అంటే మాటలా.. అందుకు తగ్గట్లుగానే భారీ బడ్జెట్ - హైప్ తో సినిమా తీసేందుకు ఏర్పాట్లు జరుగుతున్నాయని అన్నారు. ఇలాంటి సమయంలో సల్లూ భాయ్ ఓ బాంబ్ పేల్చేశాడు. అది నేరుగా ధూమ్ నిర్మాతల పైనే వేసినట్లయింది పరిస్థితి. ఇంతకీ సల్మాన్ పేల్చిన ఆ బాంబ్ ఏంటంటే.. తాను ఎట్టి పరిస్థితుల్లోనూ విలన్ రోల్స్ చేయనని తేల్చేశాడు బాలీవుడ్ కండల వీరుడు.

'ఏ యాక్టర్ అయినా విలన్ రోల్ చేయాలని అనుకుంటాడు. కానీ నేనలా కాదు. విలన్ రోల్ లో ఆకట్టుకోవాలని అందరికీ ఇంట్రెస్ట్ ఉన్నా.. నేను మాత్రం ఆ పాత్ర చేయను. రియల్ లైఫ్ లో ఎలాగూ హీరోయిజం బయటకు చూపించలేం కదా. కనీసం తెరపై అయినా హీరోయిజం ఉండే హీరో పాత్రలే చేస్తాను' అంటూ చెప్పుకొచ్చాడు సల్మాన్ ఖాన్. ఇందులో ఎక్కడా ధూమ్4 ప్రస్తావన లేకపోయినా.. సల్లూ భాయ్ ని విలన్ రోల్ లో చూసే ఛాన్స్ ఏ మాత్రం లేనట్లే. ఇక ధూమ్ నిర్మాతలకు లేటెస్ట్ మూవీలో విలన్ గా ఉన్న ఆప్షన్ షారూక్ ఖాన్ ఒక్కడే.