ధూమ్-3 రికార్డు బద్దలవబోతోంది

సల్మాన్ ఖాన్ రికార్డుల వేట కొనసాగుతోంది. రెండో వీకెండ్ లోనూ సుల్తాన్ సినిమా అదిరిపోయే వసూళ్లు సాధించింది. ఈ శుక్రవారం నుంచి ఆదివారం వరకు ఈ సినిమా రూ.35 కోట్ల నెట్ వసూళ్లు సాధించింది. హైయెస్ట్ గ్రాసింగ్ ఇండియన్ ఫిల్మ్స్ లిస్టులో ఐదో స్థానంలో ఉన్న తన సినిమా ‘ప్రేమ్ రతన్ ధన్ పాయో’ను ‘సుల్తాన్’తో దాటేశాడు సల్మాన్. ప్రస్తుతం సుల్తాన్.. రూ.461 కోట్ల గ్రాస్.. రూ.260 కోట్ల నెట్ వసూళ్లతో ఐదో స్థానంలో ఉంది. ఇక సుల్తాన్ తర్వాతి టార్గెట్.. అమీర్ సినిమా ‘ధూమ్-3’నే. ఈ సినిమా ప్రపంచ వ్యాప్తంగా రూ.542 కోట్ల గ్రాస్ కలెక్షన్లతో 2013 సమయానికి హైయెస్ట్ గ్రాసర్ గా నిలిచింది.

ఆ తర్వాత ఈ సినిమా వసూళ్లను ‘పీకే’ దాటేసింది. ఆ సినిమా ప్రపంచవ్యాప్తంగా రూ.790 కోట్ల దాకా గ్రాస్ కలెక్ట్ చేసింది. భజరంగి భాయిజాన్ రూ.626 కోట్లు.. బాహుబలి రూ.600 కోట్లతో మూడు నాలుగు స్థానాల్లో ఉన్నాయి. ‘సుల్తాన్’ సినిమా ‘పీకే’ను దాటడం కష్టం కానీ.. ‘భజరంగి భాయిజాన్’ను అధిగమించి రెండో స్థానానికి చేరడానికి అవకాశముంది. ముందు ధూమ్-3 వసూళ్లను మూడో వీకెండ్లో దాటడం లాంఛనమే. అలీ అబ్బాస్ జాఫర్ దర్శకత్వం వహించిన ‘సుల్తాన్’ను యశ్ రాజ్ ఫిలిమ్స్ బేనర్ మీద ఆదిత్య చోప్రా నిర్మించాడు. అనుష్క శర్మ కథానాయికగా నటించింది. మల్లయోధుడి పాత్రలో సల్మాన్ అదరగొట్టేయగా.. అనుష్క కూడా అతడికి దీటుగా నటించి మెప్పించింది.