క‌త్తికి ఓకే చెప్పేసిన భాయ్‌జాన్‌

ద‌క్షిణాది హిట్‌ సినిమాల్ని ఎగ‌రేసుకుపోతున్న ఉత్త‌రాది హీరో స‌ల్మాన్‌ ఖాన్‌.. పోకిరి - కిక్‌ - ర‌మ‌ణ (ఠాగూర్‌) సినిమాల్ని రీమేక్ చేసి హిట్లు కొట్టాడు. ఇప్పుడు త‌మిళ హిట్ చిత్రం త‌ని ఒరువ‌న్ రీమేక్ చేయ‌డానికి సిద్ధ‌మ‌వుతున్నాడు. ఇంత‌లోనే మ‌రో హాట్ న్యూస్ బాలీవుడ్ - కోలీవుడ్ స‌హా అన్ని ప‌రిశ్ర‌మ‌ల్లోనూ పాకిపోయింది. త‌మిళ స్టార్ డైరెక్ట‌ర్ మురుగ‌దాస్ ద‌ర్శ‌క‌త్వంలో భాయ్‌ జాన్‌ స‌ల్మాన్‌ ఖాన్ న‌టిస్తున్నార‌న్న‌దే ఈ హాట్ న్యూస్‌.

మురుగ‌దాస్ స్వ‌యంగా డైరెక్ట్ చేసిన క‌త్తి సినిమానే హిందీలో స‌ల్మాన్‌ ఖాన్ హీరోగా తెర‌కెక్కించ‌నున్నాడు. ఇదివ‌ర‌కే స‌ల్మాన్‌ తో క‌థాచ‌ర్చ‌లు సాగాయి. కానీ అప్ప‌ట్లో కోర్టు గొడ‌వ‌ల‌తో ఇబ్బందుల్లో ఉన్న స‌ల్మాన్ ఏదీ తేల్చి చెప్ప‌లేదు. కానీ అన్నిటిలో ఇప్పుడు క్లారిటీ వ‌చ్చి ఓకే చేసేశాడని చెబుతున్నారు. అతుల్ అగ్నిహోత్రి ఈ చిత్రాన్ని నిర్మిస్తార‌ని చెబుతున్నారు. బాలీవుడ్ సంగ‌తి స‌రే. అక్క‌డ స‌ల్మాన్ ఖాన్ హీరోగా క‌త్తి తెర‌కెక్కుతుంది. మ‌రి టాలీవుడ్ సంగ‌తేంటి? ఇక్క‌డ ఇప్ప‌టికే ఈ సినిమా రీమేక్‌ లో న‌టించేందుకు మ‌న హీరోలంతా క్యూలో ఉన్నార‌ని వార్త‌లొచ్చాయి. ఠాగూర్ మ‌ధు ద‌గ్గ‌ర రీమేక్ హ‌క్కులు ఉన్నాయ‌ని అన్నారు. నాలుగైదు పేర్లు కూడా వినిపించాయి అప్ప‌ట్లో. రామ్‌ చ‌ర‌ణ్‌ - ఎన్టీఆర్‌ - ప‌వ‌న్‌ క‌ల్యాణ్ - మ‌హేష్ పేర్లు ప్ర‌ముఖంగా వినిపించాయి.

అయితే వీళ్ల‌లో ఎవ‌రో ఒక‌రు న‌టిస్తారు, ఓకే చేసేస్తున్నారు.. అన్న ద‌గ్గ‌రే ఆగిపోయింది. ఇటీవ‌లే జూనియ‌ర్ ఎన్టీఆర్ పూర్తిగా ఆసక్తి చూపించార‌ని అన్నారు. కానీ ఇవేవీ క‌న్ఫ‌మ్ న్యూస్ కానే కాదు. ఇప్పుడు అక్కడ కండ‌ల హీరో ఓకే చేశాడు కాబ‌ట్టి మ‌న‌వాళ్ల‌కేమైనా క్లారిటీ వ‌స్తుందంటారా?