సల్మాన్ శ్రీమంతుడు అవుతున్నాడా?

ఇప్పుడైతే వందల కోట్ల వసూళ్లతో దూసుకెళ్లిపోతున్నాడు కానీ.. ఓ పదేళ్ల కిందట సల్మాన్ పరిస్థితి బాలీవుడ్ లో చాలా దారుణంగా ఉండేది. వరుస ఫ్లాపులతో, వ్యక్తిగత వివాదాలతో ఫేడవుట్ అయిపోయి.. బాగా వెనకబడిపోయాడు. అమీర్ ఖాన్, షారుఖ్ ఖాన్ లకు అతడు దరిదాపుల్లో లేడు. ఐతే ఒక్క సినిమా అతడి రాతను మార్చేసింది. అదే.. వాంటెడ్. తెలుగు బ్లాక్ బస్టర్ ‘పోకిరి’కి రీమేక్ ఈ సినిమా. వాంటెడ్ సూపర్ హిట్టవడంతో వెనుదిరిగి చూసుకోలేదు సల్మాన్. వరుసగా వంద కోట్ల సినిమాలతో ఎక్కడికో వెళ్లిపోయాడు. ఐతే అతడి మెజారిటీ హిట్లలో చాలా వరకు సౌత్ రీమేక్ లే. గత ఏడాది కూడా ‘కిక్’తో మరో బ్లాక్ బస్టర్ ఖాతాలో వేసుకున్నాడు. అందుకే ఎప్పుడూ సౌత్ సినిమాలపై ఓ కన్నేస్తుంటాడు సల్మాన్.

ఇప్పుడు సల్మాన్ కళ్లు ‘శ్రీమంతుడు’ మీద పడ్డట్లు సమాచారం. తెలుగులో ‘శ్రీమంతుడు’ సినిమాను డిస్ట్రిబ్యూట్ చేసిన ఈరోస్ ఇంటర్నేషనల్ వాళ్లు సల్మాన్ తో బాలీవుడ్ లో ఈ సినిమాను రీమేక్ చేయడానికి సన్నాహాలు చేస్తున్నట్లు తెలుస్తోంది. సల్మాన్ ‘బీయింగ్ హ్యూమన్’ పేరుతో సేవా కార్యక్రమాలు చేస్తున్న సంగతి తెలిసిందే. ఈ నేపథ్యంలో శ్రీమంతుడు రీమేక్ చేస్తే హిందీ ఆడియన్స్ బాగా కనెక్టవుతారని సన్నిహితులు కూడా సలహా ఇస్తున్నారట. సల్మాన్ ఇంతకుముందు చేసినవన్నీ ఎంటర్ టైన్ మెంట్ బేస్డ్ మాస్ మూవీస్. ఐతే ఇటీవల ‘భజరంగి భాయిజాన్’తో ప్రేక్షకుల గుండెల్ని తట్టాడు కండల వీరుడు. ఈ ఫ్లోలోనే శ్రీమంతుడు లాంటి స్ట్రాంగ్ ఎమోషన్స్ ఉన్న సినిమా చేస్తే కలిసొస్తుందని.. ఈరోస్ వాళ్లు అతడితో మంతనాలు సాగిస్తున్నారట. త్వరలోనే ఈ విషయంపై ఓ క్లారిటీ వచ్చే అవకాశముంది.