బాలీవుడ్ హీరోకి టాలీవుడ్ ఎంట్రీ ఎలాంటి అనుభవాన్ని మిగులుస్తుందో..?

బాలీవుడ్ స్టార్ హీరో సల్మాన్ ఖాన్ ఇప్పుడు టాలీవుడ్ లో అడుగుపెడుతున్న సంగతి తెలిసిందే. మెగాస్టార్ చిరంజీవి నటిస్తున్న ''గాడ్‌ ఫాదర్'' సినిమాలో కండల వీరుడు కీలక పాత్ర పోషించారు. చిరంజీవి మరియు రామ్ చరణ్ లతో ఉన్న సాన్నిహిత్యంతోనే అగ్ర నటుడు ఈ ప్రాజెక్ట్ లో భాగమయ్యారని తెలుస్తోంది.

మలయాళంలో ఘనవిజయం సాధించిన 'లూసిఫర్' చిత్రానికి రీమేక్ గా 'గాడ్ ఫాదర్' తెరకెక్కుతోంది. మోహన్ రాజా దీనికి దర్శకత్వం వహిస్తున్నారు. రీమేక్ అయినప్పటికీ ఇద్దరు సీనియర్ హీరోలను దృష్టిలో పెట్టుకుని స్క్రిప్టులో మార్పులు చేసినట్లు అర్థమవుతోంది.

ఒరిజినల్ వెర్సన్ లో డైరెక్టర్ పృథ్వీరాజ్ సుకుమారన్ పోషించిన షార్ఫ్ షూటర్ పాత్రలో సల్మాన్ కనిపించనున్నారు. అయితే ఇక్కడ ఆ పాత్ర నిడివి కాస్త పెంచినట్లు ఆ మధ్య టాక్ వచ్చింది. దీనికి తగ్గట్టుగానే చిరంజీవి - సల్మాన్ ఖాన్ లపై 'తార్ మార్ తక్కర్ మార్' వంటి స్పెషల్ సాంగ్ ని షూట్ చేశారు.

సల్మాన్ ఖాన్ స్పెషల్ రోల్ చేస్తుండటంతో 'గాడ్ ఫాదర్' చిత్రాన్ని తెలుగుతో పాటుగా హిందీలో కూడా విడుదల చేయాలని మేకర్స్ నిర్ణయానికి వచ్చారు. ఈ నేపథ్యంలో ఇప్పటికే విడుదలైన టీజర్ మరియు ఫస్ట్ సింగిల్ హిందీ వెర్షన్ ని కూడా ఆవిష్కరించారు. అయితే ఈ ప్రమోషనల్ కంటెంట్ ఆశించిన స్థాయిలో లేదనే కామెంట్స్ వస్తున్నాయి.

'గాడ్ ఫాదర్' మూవీ మేకర్స్ సరైన రీతిలో ప్రమోషన్స్ చేయడం లేదని.. అందుకే రిలీజ్ డేట్ దగ్గర పడుతున్నా కావాల్సినంత బజ్ క్రియేట్ చేయలేకపోయిందని నెటిజన్లు అంటున్నారు. దీనికి తోడు ఇప్పుడు సల్మాన్ ఖాన్ కూడా మేకర్స్ ప్లానింగ్ విషయంలో అప్సెట్ అవుటన్నట్లు పుకార్లు పుట్టుకొచ్చాయి

ప్రమోషన్స్ లో భాగంగా అనంతపురం బస్టాండ్ పక్క కాలేజీ గ్రౌండ్స్ లో 'గాడ్ ఫాదర్' ప్రీ రిలీజ్ ఈవెంట్ ను ఘనంగా నిర్వహించడానికి ప్లాన్ చేస్తున్నారని వార్తలు వస్తున్నాయి. దీనికి సల్మాన్ కూడా హాజరవుతారని అన్నారు. అయితే ఇప్పుడు దానిని వాయిదా వేసే అవకాశం ఉందని రూమర్స్ వస్తున్నాయి.

సల్మాన్ ఈ సినిమాతో తెలుగు ప్రేక్షకులకు మరింత దగ్గరవుతాడని అందరూ భావించారు. కానీ ఇప్పుడు ప్రమోషన్స్ విషయంలో అలసత్వం వహించడంతో సల్మాన్ కలత చెందారని.. హిందీ వెర్షన్ విడుదల కూడా ముందుకు వెళ్లడం లేదని పుకార్లు వినిపిస్తున్నాయి. అయితే అదేమీ నిజం కాదని.. హిందీ విడుదల కూడా కన్ఫర్మ్ అయిందని మరో న్యూస్ చక్కర్లు కొడుతోంది.

ఏదేమైనా 'గాడ్ ఫాదర్' సినిమాపై హైప్ క్రయేట్ చేయడానికి రాబోయే రెండు వారాల్లో అగ్రిసివ్ గా ప్రమోషన్స్ చేయాల్సిన అవసరముంది. ఆకట్టుకునే పాటలు మరియు థియేట్రికల్ ట్రైలర్ ను లాంచ్ చేయాలి. మేకర్స్ ఏం చేస్తారో చూడాలి. మరి మేకర్స్ ఏం ప్లాన్ చేస్తారో.. సల్మాన్ కు ఈ సినిమా ఎలాంటి అనుభవాన్ని మిగులుస్తుందో చూడాలి.

కాగా, 'గాడ్ ఫాదర్' చిత్రాన్ని కొణిదెల ప్రొడక్షన్స్ సమర్పణలో మెగా సూపర్ గుడ్ ఫిలింస్ బ్యానర్ పై ఆర్‌బి చౌదరి మరియు ఎన్‌వి ప్రసాద్‌ నిర్మిస్తున్నారు. దసరా సందర్భంగా అక్టోబర్ 5న ప్రపంచ వ్యాప్తంగా విడుదల చేయడానికి సన్నాహాలు చేస్తున్నారు.



నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.