‘రివ్యూ ప్రూఫ్’ అన్న సల్మాన్..ఇప్పుడేమంటాడో?

రంజాన్ వీకెండ్లో ఇటు తెలుగులో.. అటు హిందీలో రిలీజైన రెండు సినిమాలకు సంబంధించిన రివ్యూలపై ఆసక్తికర చర్చ నడుస్తోంది. ఆ రెండు సినిమాల హీరోలూ రివ్యూ రైటర్ల మీద సెటైర్లు వేసేశారు. విమర్శలు గుప్పించారు. ఇక్కడ అల్లు అర్జున్ ‘దువ్వాడ జగన్నాథం’ విడుదల తర్వాత రివ్యూయర్ల మీద పడితే.. అక్కడ సల్మాన్ ఖాన్ తన సినిమా ‘ట్యూబ్ లైట్’ విడుదలకు ముందే సమీక్షకుల్ని టార్గెట్ చేశాడు. బన్నీ చేసింది పక్కా మాస్ మసాలా సినిమా కావడం.. తెలుగు సినిమాలు స్లంప్ లో ఉన్నపుడు ఇది రిలీజ్ కావడం కలిసొచ్చి వీకెండ్లో మంచి వసూళ్లే వచ్చాయి. కానీ ‘ట్యూబ్ లైట్’ డల్ మూవీ కావడం.. క్లాస్ టచ్ ఉండటం.. పైగా నెగెటివ్ టాక్ రావడం వల్ల దానికి పెద్ద దెబ్బే పడింది. ముఖ్యంగా సల్మాన్ అభిమానులు మెచ్చేలా లేకపోవడంతో ఈ సినిమాకు పేలవమైన వసూళ్లు వస్తున్నాయి.

ఎప్పుడో ఆరేళ్ల కిందట విడుదలైన సల్మాన్ మూవీ ‘బాడీ గార్డ్’ కంటే తొలి వీకెండ్లో ‘ట్యూబ్ లైట్’కు తక్కువ వసూళ్లు రావడం షాకింగే. ‘బాడీ గార్డ్’ అప్పట్లోనే ఫస్ట్ వీకెండ్లో రూ.88.75 కోట్లు వసూలు చేస్తే.. ‘ట్యూబ్ లైట్’ రూ.64.77 కోట్లే రాబట్టింది. ‘బాడీ గార్డ్’ తర్వాత వచ్చిన ఏ సల్మాన్ సినిమా కూడా ఫస్ట్ వీకెండ్లో ‘ట్యూబ్ లైట్’ కంటే తక్కువ వసూళ్లు రాబట్టలేదు. సల్మాన్ గత రెండు సినిమాలూ తొలి వారాంతంలో రూ.100 కోట్లకు పైగా కొల్లగొట్టాయి. అలాంటిది ‘ట్యూబ్ లైట్’కు ఇంత దారుణంగా వసూళ్లు రావడమేంటో అర్థం కావడం లేదు. తన సినిమాకు సింగిల్ రేటింగ్స్ ఇచ్చినా పర్వాలేదని.. తన సినిమాలకు ‘రివ్యూ ప్రూఫ్’ ఉంటుందని.. కావాలంటే మైనస్ రేటింగ్స్ కూడా ఇచ్చుకోండని.. రిలీజ్ ముంగిట సవాలు విసిరాడు సల్మాన్. మరి ఇప్పుడు ఆ ప్రూఫ్ ఏమైందో కానీ.. ఇప్పుడొస్తున్న వసూళ్లపై సల్మాన్ ఏమంటాడో చూడాలి.

Like Us on Facebook : https://www.facebook.com/Tupakidotcom/