అబ్బబ్బా.. సల్మాన్ చెవిలో పెట్టేశాడుగా

బాలీవుడ్ స్టార్ హీరో సల్మాన్ ఖాన్ ఓ రోల్ కావాలని అడిగితే కుదరదు పొమ్మనే ధైర్యం ఎవరికైనా ఉంటుందా? అది కూడా సల్మాన్ ఖాన్ సొంత బేనర్ పై.. సల్లూభాయ్ సమర్పణలో తీస్తున్న చిత్రానికి ఇలాంటి పరిస్థితి ఎదురైందని చెబితే ఎవరైనా నమ్ముతారా? అది కూడా ఆ సినిమా తీస్తున్న డైరెక్టర్ సల్మాన్ సొంత సోదరుడే అయితే.

కానీ ఫ్రీకీ ఆలీ మూవీలో చేస్తానని అడిగి భంగపడ్డాడట సల్మాన్ ఖాన్. గోల్ఫ్ ఆటపై తీస్తున్న ఈ సినిమాని సల్లూభాయ్ బ్రదర్ సోహైల్ ఖాన్ డైరెక్ట్ చేయగా.. సల్మాన్ మరో సోదరుడు అర్బాజ్ ఖాన్ యాక్ట్ చేశాడు. అర్బాజ్ చేసిన ఈ పాత్రను తాను చేస్తానని నోరు తెరిచి అడిగాడట సల్మాన్. అయితే.. సోహైల్ మాత్రం ఏ మాత్రం స్పందించలేదట. చివరకు అర్బాజ్ ను తీసుకున్నాడు కానీ తనను ఆ రోల్ కు తీసుకోలేదని చెప్పాడు. ఆ పాత్ర అంత గొప్పది అని చెప్పడానికి సల్లూభాయ్ ఈ సొల్లు అంతా చెప్పి ఉండచ్చు కానీ.. ఫ్రీకీ ఆలీలో అర్బాజ్ ది లీడ్ రోల్ కాదు. ఈ మూవీలో నవాజుద్దీన్ సిద్దిఖీ హీరో.

ఆ పాత్రకు అసిస్టెంట్ రోల్ అర్బాజ్ ది. అలాంటి రోల్ సల్మాన్ చేస్తాననడం.. సోహైల్ ఆ పాత్రను ఇవ్వకపోవడం.. ఇప్పుడవన్నీ సల్మాన్ మనతో చెప్పేయడం భలేగుంది కదూ. ప్రచారం కోసం ఈ సినిమావాళ్లు ఎన్ని కబుర్లైనే చెప్పేయడానికి తెగించేస్తారు. కాకపోతే అవి కొంచెం నమ్మేలా ఉంటే బాగుంటుంది. లేకపోతే చెవిలో పూలు పెడుతున్నట్టే ఉంటుంది.. ఇప్పుడు సల్మాన్ లాగా!!