సలోని.. మరీ ఇంతగా తగ్గిపోయిందా?

తెలుగు సినిమాల్లో చాలాకాలంగా కుస్తీ పడుతున్న సలోనికి.. దర్శకుడు రాజమౌళి బ్రేక్ ఇచ్చాడు. మర్యాద రామన్నలో సునీల్ సరసన హీరోయిన్ ఆఫర్ ఇచ్చి.. ఆమెకు హిట్ అందించాడు. అయితే.. జక్కన్న ఇచ్చిన జోష్ ని సునీల్ బాగానే వాడుకుని హీరో అయిపోతే.. సలోని మాత్రం ఈ క్రేజ్ ని క్యాష్ చేసుకోలేకపోయింది. ఆ తర్వాత ఒకటీ అరా చిన్నా చితకా పాత్రలతో నెట్టుకొచ్చేసింది.

బాడీగార్డ్ లో గెస్ట్ రోల్.. రేసుగుర్రంలో చేసిన బన్నీకి వదిన పాత్రలాంటివి చేసినా.. ఇవన్నీ ఆయా సినిమాల్లో అంతో ఇంతో ఇంపార్టెన్స్ ఉన్న పాత్రలే. కానీ ఇప్పుడు ఏకంగా బర్నింగ్ స్టార్ పృథ్వీకి జోడీగా నటించేస్తోంది సలోని. పృథ్వీని హీరోగా పెట్టి ఎవరైనా సినిమా తీస్తుంటే.. అందులో హీరోయిన్ గా నటిస్తే.. అంతో ఇంతో సరిపెట్టుకోవచ్చు. కానీ ఈమె చేస్తున్నది హీరోయిన్ పాత్రేమీ కాదు.

బెంగాల్ టైగర్ లాంటి సినిమాలను తీసిన శ్రీసత్యసాయి ఆర్ట్స్ పతాకంపై నవీన్ చంద్ర-శృతి సోధిలు జంటగా తెరకెక్కే మూవీలో పృథ్వీ ఓ కమెడియన్. కాకపోతే ఇప్పుడున్న క్రేజ్ ప్రకారం ఇతరులకంటే కాస్త పెద్ద పాత్ర అంతే. అతనికి జంటగా సలోని నటిస్తోంది. ఇక రేంజ్ లు లాంటివి తీసి పక్కన పెడితే.. ఇద్దరూ స్కూల్ బ్యాగులు మోసుకుంటూ సైకిల్ తొక్కుకుంటూ వెళ్తున్న ఫోటోలో మాత్రం కామెడీ బాగానే పండింది.