సమంత, చైతు.. 'యు' టర్న్!!

అక్కినేని నాగచైతన్య - సమంత హీరో హీరోయిన్లుగా పలు చిత్రాల్లో నటించారు. వాళ్లిద్దరి ఆన్ స్క్రీన్ కెమిస్ట్రీ అదుర్స్ అనాల్సిందే. ఇప్పటివరకూ వీరి కాంబినేషన్ లో ప్రతీ సన్నివేశం పండింది, ప్రతీ చిత్రం హిట్ అయింది. అంతెందు.. తనకు చైతూతో నటించడమే కంఫర్టబుల్ అని సమంత ఓపెన్ గానే చాలాసార్లు చెప్పింది. అలాంటి శామ్స్... రీసెంట్ గా చైతూతో కలిసి ఓ సీక్రెట్ ట్రిప్ వేసింది. సమంత - చైతులు కలిసి బెంగళూరు వెళ్లొచ్చారు.

వీళ్లద్దరూ కలిసి ఇలా బెంగళూరు వెళ్లడం అందరినీ ఆశ్చర్యాన్ని కలిగించింది. ఒకటి రెండు రూమర్స్ కూడా పుట్టుకొచ్చేశాయి. అయితే.. వీళ్లిద్దరి ట్రిప్ కి సంబంధించిన అసలు విషయం ఇప్పుడు బయటకొచ్చింది. ఓ నెల రోజుల క్రితం శాండల్ వుడ్ లో 'యు టర్న్' అనే మూవీ ట్రైలర్ రిలీజ్ అయింది. ఈ ట్రైలర్ సూపర్బ్ గా ఉందని విపరీతంగా నచ్చేసిందని సౌత్ లో చాలామంది నటీనటులు చెప్పారు. సమంత కూడా ఈ విషయాన్ని చెప్పింది. ఇప్పుడా మూవీ షూటింగ్ కంప్లీట్ కావడంతో.. యూ టర్న్ స్పెషల్ షో చూసేందుకు శామ్స్ ప్లాన్ చేసుకుంది. యూ టర్న్ ను తెలుగు - తమిళ్ లో రీమేక్ చేయాలన్నది సమంత ఆలోచన.

దీనికి సంబంధించిన సాధ్యాసాధ్యాలు తెలుసుకునేందుకు సమంత బెంగళూరు టూర్ పెట్టుకుని.. తోడురమ్మంటూ చైతూను కూడా పిలిచింది. ఇద్దరూ కలిసి పవన్ కుమార్ దర్శకత్వంలో రూపొందిన చిత్రాన్ని స్పెషల్ షో వేయించుకుని మరీ చూశారు. రీమేక్ కి సంబంధించిన డీటైల్స్ త్వరలో చెప్తామని సమంత చెప్పినట్లు... పవన్ ఓ ఇంటర్వ్యూలో ప్రకటించాడు.