వాట్టే టైమింగ్ స‌మంతా?!

తెర‌పైనే కాదు... బ‌య‌ట కూడా అద్భుత‌మైన టైమింగ్‌ ని క‌న‌బరుస్తోంది స‌మంత‌. సినిమా సెట్స్‌ పైకి వెళ్లే వ‌ర‌కు తాను కొత్త‌గా ఏం చేయ‌బోతోందో అస్స‌లు చెప్ప‌దు. ఎందుక‌లా అని అడిగితే `మీకు తెలుసు క‌దా? నా స్టైలే అంత` అని జ‌వాబిస్తుంటుంది. ముందుగా చెప్పేసి ఆ త‌ర్వాత సినిమా ప‌ట్టాలెక్క‌క‌పోతే బాగోదు క‌దా అనేది ఆమె అభిప్రాయం. ఎప్పుడూ తెలుగు సినిమాల‌పై అమితంగా ప్రేమ చూపే స‌మంత కొంత‌కాలంగా త‌మిళ్ సినిమాల‌తో బిజీ అయిపోయింది. కార‌ణ‌మేంటంటే... కొత్త ర‌క‌మైన క‌థ‌లే అని చెబుతోంది. అక్క‌డ వినూత్న‌మైన క‌థ‌లు దొరికాయి కాబ‌ట్టి అక్క‌డికి వెళ్లాన‌ని, ఇక్క‌డ మంచి క‌థ‌లొస్తే మ‌ళ్లీ ఇక్క‌డ సినిమాలు చేస్తాన‌ని చెబుతుంటుంది.

`స‌న్నాఫ్ స‌త్య‌మూర్తి` త‌ర్వాత ఆమె తెలుగులో ఆచితూచి మ‌హేష్ `బ్ర‌హ్మోత్స‌వం`తో పాటు, నితిన్‌ తో క‌లిసి త్రివిక్ర‌మ్ ద‌ర్శ‌క‌త్వంలో సినిమా చేయ‌డానికి గ్రీన్ సిగ్న‌ల్ ఇచ్చింది. త్రివిక్ర‌మ్ త‌దుప‌రి సినిమాలో స‌మంత న‌టించ‌బోతోంద‌ని చాలా కాలంగా వార్త‌లొస్తున్నాయి. అయితే ఆ విష‌యాన్ని ఆమె మాత్రం బ‌య‌ట‌పెట్టేది కాదు. ఎట్ట‌కేల‌కు అంద‌రూ ఊహించిన‌ట్టుగానే త్రివిక్ర‌మ్‌-స‌మంత‌ల కాంబినేష‌న్ కుదిరిపోయింది. అయితే ఈ సినిమా ప్ర‌క‌ట‌న మాత్రం భ‌లే టైమింగ్‌ తో బ‌య‌టికొచ్చింది. ప్ర‌స్తుతం స‌మంత త‌మిళంలో విక్ర‌మ్‌ తో క‌లిసి `10 ఎంద్ర‌తుకుల్లా` అనే సినిమా చేస్తోంది. ఆ సినిమా చిత్రీక‌ర‌ణ ఆదివారమే పూర్త‌యింది. సినిమాకి అలా గుమ్మ‌డికాయ కొట్టేశారో లేదో వెంట‌నే తెలుగులో స‌మంత కొత్త క‌మిట్‌ మెంట్ ప్ర‌క‌టన బ‌య‌టికొచ్చింది. దీంతో స‌మంత టైమింగే టైమింగ్ అంటున్నారంతా.

స‌మంత కోస‌మే త్రివిక్ర‌మ్ ఇన్నాళ్లూ త‌న సినిమా ప‌ట్టాలెక్కించ‌లేద‌నీ, ఆమె అక్క‌డ సినిమా ఫినిష్ చేసేస‌రికి ఇక్క‌డ ప్ర‌క‌ట‌న ఇప్పించేశాడ‌ని అంటున్నారు. అన్న‌ట్టు త్రివిక్ర‌మ్‌, స‌మంత‌ల మ‌ధ్య మంచి స్నేహం కుదిరిన‌ట్టు క‌నిపిస్తోంది. స‌మంతని ఊహించుకోకుండా త‌న సినిమాల్లో హీరోయిన్ క్యారెక్ట‌ర్స్‌ ని రాసుకోలేడేమో అనిపిస్తోంది. `అత్తారింటికి దారేది` మొద‌లుకొని స‌మంత‌తో వ‌రుస‌గా మూడో చిత్రం చేస్తున్నాడు త్రివిక్ర‌మ్‌. హిట్ పెయిర్ అంటే ఇన్నాళ్లూ హీరో హీరోయిన్ల‌నే అనుకొనేవాళ్లం. ఇప్పుడు త్రివిక్ర‌మ్‌, స‌మంత కాంబినేష‌న్‌ ని చూస్తే ... ద‌ర్శ‌కుడు, హీరోయిన్‌ ని కూడా హిట్ పెయిర్ అనొచ్చేమో అనిపిస్తోంది.