70 ఏళ్ల వృద్ధురాలిగా సమంత?

స్టార్ హీరోయిన్లు పిల్లల తల్లిగా నటించడానికే సందేహిస్తారు. కథానాయికగా కెరీర్ ముగిసిపోయి.. కొంచెం గ్యాప్ తర్వాత సినిమాల్లోకి రీఎంట్రీ ఇచ్చినపుడే ఈ తరహా పాత్రల్ని ఎంచుకుంటారు. అలాంటిది సమంత ఇంకా హీరోయిన్ గా మంచి స్థాయిలో ఉండగానే 70 ఏళ్ల వృద్ధురాలిగా నటించడం అంటే వినడానికి ఏదోలా ఉంటుంది. కానీ ఇదే నిజం అంటున్నాయి టాలీవుడ్ వర్గాలు. కొరియాలో క్లాసిక్ గా నిలిచిన ‘మిస్ గ్రానీ’ అనే సినిమాను తెలుగులోకి రీమేక్ చేస్తున్నారని.. అందులో సమంతే కథానాయికగా నటిస్తుందని గుసగుసలు వినిపిస్తున్నాయి. సమంత ఆల్రెడీ ‘యు టర్న్’ అనే లేడీ ఓరియెంటెడ్ సినిమా చేసింది. ఇలా ఆమె హీరోయిన్ ఓరియెంటెడ్ సినిమా చేయడం ఇదే తొలిసారి. ఈ చిత్రంపై మంచి అంచనాలే ఉన్నాయి.

అది విడుదల కాకముందే ‘మిస్ గ్రానీ’ రీమేక్ సమంత దగ్గరికి వచ్చిందట. సమంత భర్త నాగచైతన్యకు మావయ్య అయిన దగ్గుబాటి సురేష్ బాబు ఈ చిత్రాన్ని సునీత తాటి అనే మరో నిర్మాతతో కలిసి నిర్మించనున్నారట. లేడీ డైరెక్టర్ నందిని రెడ్డి ఈ సినిమాను డైరెక్ట్ చేస్తుందని అంటున్నారు. సమంత-నందిని కాంబినేషన్లో ఇంతకుముందే ‘జబర్దస్త్’ అనే సినిమా వచ్చింది. ఆ సినిమా ఆడకపోయినా.. సమంతకు నందినికి మంచి అనుబంధం ఉంది. అందుకే ‘మిస్ గ్రానీ’ని రీమేక్ చేయాలని అనుకోగానే నందినికి సమంతే గుర్తుకొచ్చింది. ‘కళ్యాణ వైభోగమే’ తర్వాత రెండున్నరేళ్లుగా ఖాళీగా ఉంది నందిని. మధ్యలో విజయ్ దేవరకొండతో ఒక సినిమా అనుకుంది కానీ.. అది వర్కవుట్ కాలేదు. అతను వేరే ప్రాజెక్టులతో ఫుల్ బిజీ అయిపోయాడు. దీంతో సమంతతో సినిమాకు రెడీ అయిపోయిందామె.