'రాంబో'గా సేతుపతి.. 'ఖతీజా'గా సమంత..!

నేషనల్ అవార్డ్ విన్నింగ్ యాక్టర్, మక్కల్ సెల్వన్ విజయ్ సేతుపతి హీరోగా నటిస్తున్న తాజా చిత్రం ''కాతువాకుల రెండు కాదల్‌''. ఇందులో దక్షిణాది అగ్ర కథానాయికలు సమంత - నయనతార హీరోయిన్లుగా నటిస్తున్నారు. నయన్ ప్రియుడు విఘ్నేష్ శివన్ ఈ చిత్రానికి దర్శకత్వం వహిస్తున్నారు. ఇప్పటికే షూటింగ్ పూర్తి చేసుకున్న ఈ సినిమా పోస్ట్ ప్రొడక్షన్ కార్యక్రమాలు చివరి దశలో ఉన్నాయి. ఈ నేపథ్యంలో తాజాగా విజయ్ సేతుపతి - సమంత రూత్ ప్రభు పాత్రలకు సంబంధించిన ఫస్ట్ లుక్ ని మేకర్స్ విడుదల చేశారు.

'కాతువాకుల రెండు కాదల్‌' చిత్రంలో రాంబో అనే పాత్రలో విజయ్ సేతుపతి కనిపించనున్నారు. రంజన్ కుడి అన్బరసు మురుగేశ భూపతి ఓహూందిరన్ అనే పేరును షార్ట్ కట్ లో రాంబోగా మార్చారని తెలుస్తోంది. ఇక సమంత ఇందులో ఖతీజా అనే యువతి పాత్రలో కనిపించనుంది. విడాకుల ప్రకటన తర్వాత సామ్ నుంచి ప్రేక్షకుల ముందుకు వస్తున్న మొదటి సినిమా ఇదే.

తాజాగా విడుదలైన ఫస్ట్ లుక్ లో ట్రెండీ స్టైలింగ్ తో ఉన్న సామ్.. చాలా బ్యూటిఫుల్ గా ఉంది. నోట్లో తన చిటికిన వేలుని పెట్టుకుని దీర్ఘంగా చూస్తున్న ఈ ఫొటోలో, సమంత చేతి మీదున్న టాటూ ప్రత్యేక ఆకర్షణగా కనిపిస్తోంది. ఇది తన భర్త నాగచైతన్య తో విడిపోక ముందు వారి మధ్య ప్రేమకు గుర్తుగా వేయించుకున్న పచ్చబొట్టు అనే సంగతి తెలిసిందే. త్వరలోనే నయనతార ఫస్ట్ లుక్ ని కూడా విడుదల చేస్తామని మేకర్స్ తెలిపారు.

రొమాంటిక్ కామెడీ ఎంటర్టైనర్ గా రూపొందుతున్న 'కాతువాకుల రెండు కాదల్‌' చిత్రాన్ని డైరెక్ట్ గా ఓటీటీలో విడుదల చేయబోతున్నట్లు వార్తలు వచ్చాయి. అయితే మేకర్స్ తాజాగా వదిలిన పోస్టర్స్ లో 2021 డిసెంబర్ లో థియేట్రికల్ రిలీజ్ చేస్తున్నట్లు పేర్కొంటూ రూమర్స్ కు చెక్ పెట్టారు. విఘ్నేష్ శివన్ - నయన్ లకు చెందిన రౌడీ పిక్చర్స్ ప్రైవేట్ లిమిటెడ్ తో కలిసి సెవెన్ స్క్రీన్ స్టూడియో బ్యానర్ పై ఎస్ఎస్ లలిత్ కుమార్ ఈ చిత్రాన్ని నిర్మిస్తున్నారు.

'కాతువాకుల రెండు కాదల్‌' చిత్రానికి అనిరుధ్ రవిచందర్ సంగీతం సమకూర్చారు. ఇప్పటికే విడుదలైన పాటలు మంచి రెస్పాన్స్ తెచ్చుకున్నాయి. కాథిర్ - విజయ్ కార్తీక్ సినిమాటోగ్రఫీ అందించగా.. శ్రీకర్ ప్రసాద్ ఎడిటింగ్ వర్క్ చేస్తున్నారు. విజయ్ సేతుపతి - నయనతార - సమంత వంటి ముగ్గురు ప్రతిభావంతులు నటించిన ఈ సినిమా ఎలాంటి విజయాన్ని అందుకుంటుందో చూడాలి.