చరణ్ కే కాదు.. సమంతకూ రికార్డే

‘రంగస్థలం’ రామ్ చరణ్ కెరీర్ నే మార్చేసింది. నటుడిగా అతడికి గొప్ప పేరు తెచ్చిపెట్టింది. అతడిని అన్ని వర్గాల ప్రేక్షకులకూ చేరువ చేసింది. అంతనా.. వసూళ్ల పరంగా కూడా చరణ్ కు ఈ చిత్రం అనేక రికార్డులు తెచ్చిపెట్టింది. ‘మగధీర’ వసూళ్ల రికార్డును బద్దలు కొట్టడమే కాదు.. ఓవరాల్ కలెక్షన్లలో ‘ఖైదీ నంబర్ 150’ తర్వాత అత్యధిక వసూళ్లు సాధించిన నాన్-బాహుబలి సినిమాగా ఈ చిత్రం రెండో స్థానానికి చేరుకుంది. త్వరలోనే ‘ఖైదీ’ రికార్డును కూడా బద్దలు కొట్టేసినా ఆశ్చర్యం లేదేమో. మరోవైపు అమెరికాలో ఈ చిత్రం ఏకంగా నాన్-బాహుబలి రికార్డును బద్దలు కొట్టింది. ‘శ్రీమంతుడు’ వసూళ్ల రికార్డును దాటేసి.. 3 మిలియన్ క్లబ్బులోకి కూడా అడుగుపెట్టింది.

ఐతే రికార్డుల మాటెత్తితే దాన్ని ఎప్పుడూ హీరోలకే ఆపాదిస్తూ ఉంటారు. వాళ్ల రికార్డుల గురించే మాట్లాడుకుంటారు. కానీ హీరోయిన్లకు కూడా రికార్డులుంటాయన్న సంగతి మరిచిపోతుంటారు. మిగతా హీరోయిన్ల మాటేమో కానీ.. సమంత విషయంలో మాత్రం రికార్డుల లెక్కలు అభిమానులు పక్కాగా మెయింటైన్ చేస్తున్నారు. ‘రంగస్థలం’ మిలియన్ డాలర్ క్లబ్బులోకి చేరగానే అమెరికాలో సమంతకు ఇది పదో మిలియన్ డాలర్ మూవీ అంటూ అభిమానులు సంబరాలు చేసుకున్నారు. ఇంతకుముందు ‘అఆ’ సినిమా 2.4 మిలియన్ డాలర్లతో సమంతకు అతి పెద్ద విజయంగా నిలిచింది. ఇప్పుడా రికార్డును ‘రంగస్థలం’ దాటేసింది. ఇది సమంతకు తొలి 3 మిలియన్ డాలర్ మూవీగా నిలిచింది. నాన్-బాహుబలి హీరోయిన్లలో సమంతదే ఇప్పుడు అగ్రస్థానం అన్నమాట.