కెప్టెన్ బయోపిక్ లో అక్కినేని కోడలు?

ప్రస్తుతం దేశవ్యాప్తంగా పీరియాడిక్ చిత్రాలకు.. మరీ ముఖ్యంగా బయోపిక్ లకు ఫుల్ డిమాండ్ ఉంది. స్పోర్ట్స్ పర్సనాలిటీస్ కు చెందిన జీవితాలపై సినిమాలకు జనాలనుంచి ఫుల్లు ఆదరణ దక్కుతోంది. ఈ జోనర్ లో వచ్చిన దాదాపు అన్ని సినిమాలు సూపర్ హిట్స్ గా నిలిచాయి. ఎంఎస్ ధోనీ-ది అన్ టోల్డ్ స్టోరీని ఓ బయోపిక్ గా రూపొందించి హిట్ సాధిస్తే.. సచిన్- ఎ బిలియన్ డ్రీమ్స్ ను డ్రాక్యుడ్రామాగా రూపొందించి విజయం సాధించారు.

ఇప్పుడు భారత మహిళా క్రికెట్ కెప్టెన్ మిథాలీ రాజ్ జీవితంపై కూడా సినిమా రూపొందబోతోంది. ప్రపంచంలో 6వేల పరుగులు పూర్తి చేసిన ఏకైక మహిళా క్రికెటర్ గా చరిత్ర పుస్తకాల్లో తన పేరును సువర్ణాక్షరాలతో లిఖించుకున్న మిథాలీ రాజ్ లైఫ్ ను.. ఇప్పుడు బయోపిక్ గా రూపొందించనుండగా.. వయాకామ్ 18 మోషన్ పిక్చర్స్ సంస్థ ఈ చిత్రాన్ని నిర్మించబోతోంది. గతంలో ఇదే సంస్థ మేరీకోమ్ జీవితాన్ని ప్రియాంక చోప్రాతో తీసిన సంగతి తెలిసిందే. ఈ బయోపిక్ ను కన్ఫాం చేస్తూ.. తనపై సినిమా వస్తోందని మిథాలీ స్వయంగా అనౌన్స్ చేసింది. అయితే.. ఒకేసారి పలు భాషల్లో రూపొందబోయే చిత్రంలో.. సౌత్ బ్యూటీ.. అక్కినేని వారింటి కాబోయే కోడలు సమంత నటించబోతోందనే న్యూస్ ఒకటి ఇప్పుడు హల్ చల్ చేస్తోంది.

పెళ్లి తర్వాత అంటే అక్కినేని వారింటి కోడలుగా సమంత మారిన తర్వాత.. ఆమె నటించబోయే తొలి చిత్రం ఇదే అని అంటున్నారు. నేషనల్ వైడ్ గా పలు భాషల్లో మిథాలీ బయోపిక్ రూపొందనుండగా.. బాలీవుడ్ .. సౌత్ భాషల్లో వేర్వేరు నటులతో రూపొందిస్తారా లేక.. సౌత్ కోసం సమంతను తీసుకున్నారా అనే విషయంపై మాత్రం ఇంకా క్లారిటీ రాలేదు.