సమంత పంచెకట్టు రాజుగారి కోసమా..

అక్కినేని వారింటి కొత్త కోడలు సమంత అత్తారింట్లోకి అడుగు పెట్టబోతోంది. ఇదే టైంలో తెలుగు ప్రేక్షకులను భయపెట్టడానికి కూడా రెడీ అయిపోతోంది. ఇంతవరకు గ్లామర్ ప్రధాన పాత్రలే ఎక్కువ చేసిన సమంత రాబోయే చిత్రం రాజుగారి గది-2లో ఆత్మగా కనిపించబోతోంది. ఈనెల 13న ఈ మూవీ థియేటర్లకు రానుంది. మలయాళ సినిమా ‘ప్రేతమ్‌’ ఆధారంగా డైరెక్టర్ ఓంకార్‌ రాజుగారిగది-2 మూవీ తీశారు. ఇందులో హీరో నాగార్జున మెంటలిస్టుగా కనిపించబోతున్నారు.

ఈ సినిమా రిలీజ్ టైం దగ్గర పడుతుంటంతో చిత్ర యూనిట్ ఓ సమంతను ఓ కొత్తలుక్ లో చూపిస్తూ పోస్టర్ రిలీజ్ చేశారు. ఇందులో సమంత తెల్లటి పంచె.. లాల్చీ - జరీకండువా వేసుకుని పల్లెటూరి పెద్దమనిషి గెటప్ లో కనిపించింది. ఇదే గెటప్ లో చేతిలో బెత్తం పట్టుకుని పిల్లలకు పాఠాలు కూడా చెబుతోంది. సమంత - రావు రమేశ్‌ పంచెకట్టులో ఉన్న ఫొటో ఒకటి గతంలోనే బయటకొచ్చింది. అయితే అది రామ్ చరణ్ హీరోగా నటిస్తున్న రంగస్థలం-1985 మూవీలోదని అంతా అనుకున్నారు. రంగస్థలం పీరియాడికల్ మూవీ కావడం.. అదీ గ్రామీణ నేపథ్యంలో తీస్తున్న సినిమా కావడంతో అంతా అలాగే భావించారు. ఇప్పటి పోస్టర్ తో అది రాజుగారి గది-2లోని పాత్ర అనే క్లారిటీ వచ్చింది.

తాజా పోస్టర్ లో అందానికే అందం అనిపించేలా... చిరునవ్వులతో మురిపించేలా కనిపించే సమంత ఈ సినిమాలో ఆత్మ పాత్రలో కనిపిస్తోందంటే కాస్తంత బాధకలగక మానదు. సమంత ఈ సినిమాతో అందరినీ భయపెడుతుందని ఆమె మామ - హీరో నాగార్జున చెప్పారు. చూద్దాం.. సమంత ఏ మేరకు భయపెడుతుందో..