మహేష్ తిరిగేది సమంత చుట్టేనట

కెరీర్లో తొలిసారి ముగ్గురు హీరోయిన్లతో రొమాన్స్ చేయబోతున్నాడు మహేష్ బాబు. ప్రిన్స్ కొత్త సినిమాలో సమంత, కాజల్ - ప్రణీత హీరోయిన్లుగా నటిస్తున్న సంగతి తెలిసిందే. ఐతే స్టార్ హీరోయిన్లు ఒకే సినిమాలో కలిసి కనిపించారంటే.. వారిలో ఎవరిది కీలక పాత్ర.. ఎవరి స్క్రీన్ ప్రెజెన్స్ ఎంత సేపు, ఎవరికి ఎన్ని పాటలున్నాయి...? ఇలాంటి ప్రశ్నలన్నీ తలెత్తడం ఖాయం. గతంలో సమంత - కాజల్ కలిసి ‘బృందావనం’ చేశారు. అందులో ఇద్దరికీ సమాన ప్రాధాన్యం దక్కింది. ఐతే ‘బ్రహ్మోత్సవం’లో మాత్రం ఇలా ఈక్వల్ షేర్ ఏమీ ఉండదంటున్నారు. ఈ సినిమాలో సమంత లీడ్ హీరోయిన్ అని.. ప్రణీతతో పాటు కాజల్ దీ సహాయ పాత్ర టైపే అని సమాచారం.

ప్రణీతది చిన్న పాత్ర అయి ఉంటుందనడంలో ఎవరికీ డౌట్లేమీ లేవు. కాజల్ విషయంలోనూ అందరూ ఆసక్తిగా ఉన్నారు. కొన్నేళ్లుగా టాలీవుడ్ లో కాజల్ జోరు పెద్దగా కనిపించట్లేదు. ఇలాంటి టైంలో ‘బ్రహ్మోత్సవం’లో ఆమెకు అవకాశం రావడమే గొప్ప అనుకున్నారు. ఐతే ఛాన్స్ అయితే ఇచ్చారు కానీ.. తన పాత్రకు చాలా లిమిటేషన్స్ ఉన్నాయని.. ఎక్కువ సేపు స్క్రీన్ మీద కనిపించదని సమాచారం. సమంత సినిమా అంతా ఉంటుందని.. మహేష్‌ తో కూడా ఆమెకే కీలకమైన సన్నివేశాలు పడ్డాయని యూనిట్ సభ్యులు చెబుతున్నారు. ఇంతకు ముందు ఇద్దరు హీరోయిన్ల సినిమాల్లో నటించినా తన ప్రాధాన్యాన్ని నిలుపుకుంది కాజల్. మరి ఆ హవాకు ‘బ్రహ్మోత్సవం’ బ్రేక్ వేస్తుందేమో చూడాలి.