'శాకుంతలం' ఫస్ట్ లుక్: దేవకన్యలా సమంత..!

టాలీవుడ్ క్రియేటివ్ డైరెక్టర్ గుణశేఖర్ దర్శకత్వంలో తెరకెక్కుతున్న పౌరాణిక ప్రేమగాథ ''శాకుంతలం''. ఇందులో స్టార్ హీరోయిన్ సమంత టైటిల్ రోల్ ప్లే చేయగా.. మలయాళ హీరో దేవ్ మోహన్ మరో ప్రధాన పాత్ర పోషించారు.

మహాభారత ఇతిహాసగాథ ఆదిపర్వంలోని శకుంతల - దుష్యంతుడి ఆహ్లాదకర అందమైన ప్రేమ కథ ఆధారంగా ఈ సినిమా రూపొందుతోంది. ఇప్పటికే షూటింగ్ పూర్తి చేసుకున్న ఈ సినిమాకు సంబంధించిన పోస్ట్ ప్రొడక్షన్ కార్యక్రమాలు శరవేగంగా జరుగుతున్నాయి. ఈ నేపథ్యంలో సినీ అభిమానులు ఎంతో ఆసక్తిగా ఎదురుచూస్తున్న ఈ మూవీ ఫస్ట్ లుక్ ని సోమవారం ఉదయం మేకర్స్ ఆవిష్కరించారు.

'శాకుంతలం' ఫస్ట్ లుక్ పోస్టర్ లో సమంత ఓ ఆశ్రమంలోని రాతిపై కొలువుదీరి.. దేని గురించే తీవ్రంగా వేచి చూస్తున్నట్లు ఉంది. తెల్లని దుస్తులు ధరించి సామ్ ఒక దేవకన్యలా ఎంతో అందంగా కన్పిస్తోంది. చుట్టూ నెమళ్ళు - హంసలు - జింకలు వంటి వన్యప్రాణులు గుమిగూడి ఆమె ప్రకృతి ప్రేమికురాలనే విషయాన్ని వెల్లడిస్తున్నాయి. ఈ పోస్టర్ పూర్తిగా సృజనాత్మక అంశాలతో ప్రేక్షకులను మరో ఫాంటసీ లోకంలోకి తీసుకెళ్లేలా డిజైన్ చేయబడింది.

పాన్ ఇండియా స్థాయిలో 'శాకుంతలం' చిత్రాన్ని తెలుగు హిందీ తమిళ మలయాళ కన్నడ భాషల్లో విడుదల చేయనున్నారు. ఇందులో శ‌కుంత‌ల‌గా స‌మంత.. దుష్యంతుడిగా దేవ్ మోహన్ కనిపించనున్నారు.

అల్లు ఫ్యామిలీ నాల్గవ తరం నుంచి అల్లు అర్జున్ కుమార్తె అర్హ ఈ సినిమాతో ఇండస్ట్రీలో అడుగుపెడుతోంది. ప్రిన్స్ భరత పాత్రలో అల్లు అర్హ కనిపించనుంది. మోహన్ బాబు - సచిన్ ఖేడేకర్ - గౌతమి - అదితి బాలన్ - అనన్య నాగళ్ల మరియు వర్షిణి సౌందరరాజన్ తదితరులు ఈ సినిమాలో భాగం కానున్నారని సమాచారం.

దిల్‌ రాజు స‌మ‌ర్ప‌ణ‌లో డీఆర్‌పీ - గుణా టీమ్ వర్క్స్‌ ప‌తాకంపై ఈ చిత్రాన్ని భారీ బడ్జెట్ తో నిర్మిస్తున్నారు. గుణశేఖర్ కుమార్తె నీలిమ గుణ ఈ సినిమాని నిర్మిస్తున్నారు. సంగీత బ్రహ్మ మణిశర్మ ఈ సినిమాకి సంగీతం సమకూరుస్తున్నారు. శేఖర్ వి జోసెఫ్ సినిమాటోగ్రఫీ అందిస్తుండగా.. ప్రవీణ్ పూడి ఎడిటింగ్ వర్క్ చేస్తున్నారు. త్వరలోనే 'శాకుంతలం' సినిమాకు సంబంధించిన మరిన్ని అప్డేట్స్ రానున్నాయి.