బాలీవుడ్ యంగ్ హీరోతో సమంత క్రేజీ ప్రాజెక్ట్..!

విడాకుల ప్రకటన తర్వాత దక్షిణాది అగ్రకథానాయిక సమంత వరుస సినిమాలతో దూసుకుపోతోంది. ఇప్పటికే రెండు బైలింగ్విల్ మూవీస్ - ఒక పాన్ ఇండియా సినిమాతో పాటుగా ఇంటర్నేషనల్ ప్రాజెక్ట్ కు ఓకే చెప్పింది. ఈ క్రమంలో లేటెస్టుగా మరో ఇంట్రెస్టింగ్ ప్రాజెక్టుకు సామ్ గ్రీన్‌ సిగ్నల్‌ ఇచ్చినట్లు తెలుస్తోంది.

దర్శక ద్వయం రాజ్‌ & డీకే తెరకెక్కించిన 'ఫ్యామిలీ మ్యాన్‌-2' వెబ్ సిరీస్‌ తో సమంత డిజిటల్ ఎంట్రీ ఇచ్చారనే సంగతి తెలిసిందే. రాజీ అనే నెగెటివ్‌ షేడ్స్‌ ఉన్న బోల్డ్ పాత్రలో నటించి అందరి ప్రశంసలు అందుకుంది సామ్. అయితే ఇప్పుడు అమెజాన్ ప్రైమ్ ఓటీటీ కోసం రాజ్‌ - డీకే రూపొందించే ఓ యాక్షన్-ప్యాక్డ్ సిరీస్ లో సమంత నటించనుంది.

బాలీవుడ్‌ యువ హీరో వరుణ్‌ ధావన్‌ ఈ సిరీస్ లో ప్రధాన పాత్ర పోషిస్తుండగా.. ఫీమేల్ లీడ్ కోసం సమంత ను ఎంపిక చేసినట్లు నివేదికలు వెల్లడిస్తున్నాయి. వరుణ్‌ ధావన్ - సమంత తొలిసారి కలిసి నటించనున్న ఈ వెబ్ సిరీస్ ద్వారా వరుణ్ ధావన్ ఓటీటీ ఎంట్రీ ఇవ్వనున్నారని బాలీవుడ్ మీడియా వర్గాలు వెల్లడించాయి.

గూఢచర్యం నేపథ్యంలో సాగే కథతో రూపొందుతున్న ఈ సిరీస్ లో.. వరుణ్ ధావన్ - సామ్ ఇద్దరూ గూఢచారులుగా చాలా స్టైలిష్ గా కనిపించనున్నారట. ఇందులో యాక్షన్‌ సీన్స్ కోసం ఇద్దరూ ప్రత్యేకంగా శిక్షణ కూడా తీసుకోబోతున్నారట. సమంత - వరుణ్ కలిసి నటిస్తుండటంతో ఈ ప్రాజెక్ట్ మరింత ఆసక్తికరంగా మారింది.

'అవెంజర్స్‌' వంటి పాపులర్ సూపర్‌ హీరో చిత్రాలకు దర్శకత్వం వహించిన రూస్సో బ్రదర్స్‌ ఈ స్పై సిరీస్ ను నిర్మిస్తారని తెలుస్తోంది. ఇప్పటికే రుస్సో బ్రదర్స్‌ ఆధ్వర్యంలో ''సిటాడెల్‌'' అనే ఓ ఇంటర్నేషనల్ యాక్షన్‌ స్పై థ్రిల్లర్‌ సిరీస్ తెరకెక్కుతోంది. ఇందులో ప్రియాంక చోప్రా - రిచర్డ్‌ మ్యాడెన్‌ ప్రధాన పాత్రలు పోషిస్తున్నారు. 2022 ఏప్రిల్‌ లో ఈ సిరీస్‌ స్ట్రీమింగ్‌ కానుంది.

ఇప్పుడు ''సిటాడెల్‌'' సిరీస్ ఇండియన్ వెర్షన్ నే రాజ్‌ & డీకే దర్శకత్వంలో వరుణ్‌ ధావన్‌ - సమంత లతో ప్లాన్ చేస్తున్నారని అంటున్నారు. భారతీయ ప్రేక్షకుల కోసం కొన్ని మార్పులతో ఈ స్పై థ్రిల్లర్ సిరీస్‌ ను తెరకెక్కించనున్నారట. వచ్చే ఏడాది పట్టాలెక్కనున్న ఈ సిరీస్.. 2023లో అమెజాన్ ప్రైమ్ లోకి వచ్చే అవకాశాలు ఉన్నాయి. త్వరలోనే దీనికి సంబంధించిన అధికారిక ప్రకటన వెలువడుతుందేమో చూడాలి.

ఇటీవల 'పుష్ప: ది రైజ్' సినిమాలో ఐటమ్‌ సాంగ్‌ లో కనిపించిన సమంత.. 'కాతువాకుల రెండు కాదల్' 'శాకుంతలం' సినిమాలను పూర్తి చేసింది. ప్రస్తుతం 'యశోద' అనే పాన్ ఇండియా చిత్రంతో పాటు, 'ది అరేంజ్‌మెంట్స్‌ ఆఫ్‌ లవ్‌' అనే హాలీవుడ్ మూవీలో సామ్ నటిస్తోంది. అంతేకాదు తాప్సి పన్నూ నిర్మించే ఓ హిందీ సినిమాతో సమంత బాలీవుడ్ ఎంట్రీ ఇవ్వనుందని టాక్ నడుస్తోంది.