యు టర్న్ తీసుకోనున్న సమంత!?

టాలీవుడ్ టాప్ బ్యూటీ సమంత.. తెలుగులో సినిమా చేసి చాలా కాలం అయింది. త్రివిక్రమ్ మూవీ అ..ఆ.. తర్వాత ఒక్క తెలుగు సినిమాకు కూడా ఈ భామ సైన్ చేయలేదు. తమిళ్ లో రెండు సినిమాలు చేస్తోంది కానీ.. తెలుగు మూవీ మాత్రం కన్ఫాం కాలేదు. ప్రస్తుతం రామ్ చరణ్-సుకుమార్ డైరెక్షన్ లో తెరకెక్కనున్న సినిమాలో సమంతను తీసుకున్నారనే టాక్ మాత్రం ఉంది.

అయితే.. గతేడాది ఓ కన్నడ మూవీని తెలుగు-తమిళ్ లో రీమేక్ చేసేందుకు శామ్ ఆసక్తి చూపించింది. అప్పట్లో చైతుతో కలిసి బెంగళూరు వెళ్లి మరీ 'యూ టర్న్' మూవీ చూడ్డమే కాదు.. ఆ సినిమా దర్శకుడు పవన్ కుమార్ తో కూడా చర్చలు జరిపింది సమంత. ఆ తర్వాత పర్సనల్ పనులతో శామ్స్ బిజీ అయిపోవడంతో.. ఆ ప్రాజెక్టు సంగతులు తెలియలేదు. ఇప్పుడా చిత్రాన్ని ప్రారంభించబోతోందట సమంత. క్రైమ్ థ్రిల్లర్ జోనర్ లోని యూ టర్న్ రీమేక్ ను.. కన్నడ వెర్షన్ కు దర్శకుడే తెలుగులోనూ తెరకెక్కించనున్నాడు.

ప్రస్తుతం సమంత రెండు తమిళ సినిమాల్లో నటిస్తోంది. విశాల్ కి జోడీగా ఇరుంబు తిరాయ్.. విజయ్ సేతుపతితో అనీతి కథైగళ్ చిత్రాల్లో బిజీగా ఉంది సమంత. ఫిబ్రవరిలో యూ టర్న్ రీమేక్ షూటింగ్ ప్రారంభమయ్యే అవకాశాలున్నాయని టాక్ వినిపిస్తోంది.


Like Us on Facebook : https://www.facebook.com/Tupakidotcom/