సమంత మూగ అమ్మాయేనా..

ఒక్కనిమిషం వ్యవధి ఉన్న టీజర్ తో రంగస్థలం మూవీపై ప్రేక్షకుల్లో విపరీతమైన క్యూరియాసిటీ పెరిగింది. చాలా రోజుల తరవాత తెలుగులో పీరియాడికల్ సినిమాలో ఓ స్టార్ హీరో నటించడం.. అదీ పూర్తి రూరల్ బ్యాక్ గ్రౌండ్ తో తెరకెక్కిన సినిమా కావడంతో రంగస్థలంపై అంచనాలు బాగా పెరిగాయి.

మొదటిగా రిలీజైన రంగస్థలం టీజర్ లో హీరో రామ్ చరణ్ పాత్రను ప్రేక్షకులకు పరిచయం చేశారు. దీంతోపాటుగా ఇందులో రామ్ చరణ్ చెవిటివాడిగా కనిపిస్తాడనేది కూడా కన్ఫర్మ్ చేశాడు. ఇదే టైంలో హీరోయిన్ సమంత ఇందులో మూగదానిగా కనిపించనుందనే మాట చాలా రోజుల నుంచి వినిపిస్తోంది. తాజాగా సమంత పాత్రతో ఓ టీజర్ విడుదల చేశారు. ఇందులో ఆమె పూర్తి డీ గ్లామరైజ్డ్ రోల్ చేసింది. తొలి టీజర్ లో చిట్టిబాబు పాత్ర తన గురించి తాను పరిచయం చేసుకుంటూ సాగుతుంది. ఇప్పుడొచ్చిన టీజర్ లోనూ సమంత చేసిన రామలక్ష్మి పాత్ర గురించి కూడా చిట్టిబాబు పాత్రే నెరేట్ చేస్తూ వచ్చింది. దీనిని బట్టి చూస్తే సమంత మూగ అమ్మాయి పాత్రే చేసి ఉంటుందని అభిమానులు లెక్కలు వేస్తున్నారు.

మైత్రి మూవీ మేకర్స్ బ్యానర్ పై నిర్మిస్తున్న రంగస్థలం చిత్రానికి దేవిశ్రీ ప్రసాద్ సంగీతం అందిస్తున్నాడు. మార్చి ఆఖరున ఈ మూవీ థియేటర్లకు రానుంది. ఇందులో ఆది పినిశెట్టి.. జగపతిబాబు.. ప్రకాష్ రాజ్ కూడా నటించారు. వాళ్లందరికీ వేర్వరుగా ఇంట్రడక్షన్ టీజర్లు రిలీజ్ చేస్తామని మైత్రీ మూవీ మేకర్స్ అనౌన్స్ చేసింది.