సమంత.. ఒక హాలీవుడ్ థ్రిల్లర్

అక్కినేని వారి కోడలు సమంత వచ్చే ఏడాది సినిమాలకు టాటా చెప్పేయబోతోందంటూ ఒక పిచ్చి ప్రచారం జరిగింది కొన్ని రోజుల కిందట. కానీ అలాంటిదేమీ లేదని క్లారిఫికేషన్ వచ్చేసింది. సమంతతో పాటు ఆమె భర్త నాగచైతన్య సైతం ఈ విషయాన్ని ఖండించారు. పెళ్లి తర్వాత మరింత మంచి పాత్రలతో సాగిపోతున్న సమంత సినిమాలు ఆపేయడానికి కారణమే కనిపించదసలు. ప్రస్తుతం ఆమె తెలుగులో ‘యుటర్న్’.. తమిళంలో ‘సీమరాజా’ సినిమాలతో బిజీగా ఉంది. ఇవి త్వరలోనే విడుదలకు సిద్ధమవుతోంది. దీని తర్వాత ‘నిన్ను కోరి’ ఫేమ్ శివ నిర్వాణ దర్శకత్వంలో నాగచైతన్యతో కలిసి ఓ సినిమా చేయబోతోంది సామ్. తాజాగా ఆమె మరో కొత్త సినిమాకు ఓకే చేసినట్లు సమాచారం.

‘అర్జున్ రెడ్డి’ దర్శకుడు సందీప్ రెడ్డి వంగా శిష్యుడైన గిరిసయ్య డైరెక్టర్ గా పరిచయం కాబోతున్న చిత్రంలో సమంత కీలక పాత్ర పోషించనుందట. ఈ చిత్రం హాలీవుడ్ లో సూపర్ హిట్టయిన థ్రిల్లర్ మూవీ ‘కొలాటెరల్’ స్ఫూర్తితో తెరకెక్కనుందని సమాచారం. అందులో సూపర్ స్టార్ టామ్ క్రూయిజ్ ప్రధాన పాత్ర పోషించడం విశేషం. ఐతే తెలుగులో హీరో ఓరియెంటెడ్ గా కాకుండా కొన్ని పాత్రల నేపథ్యంలో ఈ కథను నడిపిస్తారట. ‘గరుడవేగ’లో మెరిసిన అరుణ్ ఆదిత్‌ తో పాటు నవదీప్.. మురళీ శర్మ.. సాయిచంద్ ఇందులో మిగతా కీలక పాత్రల్లో నటిస్తారట. సమంత ఇందులో ట్యాక్సీ డ్రైవర్ పాత్ర పోషిస్తుందని సమాచారం. ఆద్యంతం ఉత్కంఠభరితంగా సాగే థ్రిల్లర్ మూవీ ఇదని.. సమంతకు కథ బాగా నచ్చి ఈ సినిమాను ఓకే చేసిందని అంటున్నారు.