సమంత అటెళ్ళి ఉపయోగం ఏముంది??

హీరోయిన్ సమంత ఇప్పుడు నిత్యం వార్తల్లో ఉంటుంది. ఆ మధ్యన ఈమె పెళ్ళి టాపిక్ గురించి డిస్కస్ చేయని రోజులేదంటే చూస్కోండి. అమ్మడు తాజాగా జనతా గ్యారేజ్ ఆడియో రిలీజ్ కు రాకపోవడం ఇప్పుడు హాట్ న్యూస్ అయిపోయింది. పైగా ఒంట్లో బాగోలేదు కాబట్టి రావడంలేదని చెప్పిన సమంత.. ఆ మరుసటి రోజునే బెంగుళూరులో బాహర్ కేఫ్‌ ఓపెనింగుకు అతిథిగా వెళ్ళడం చర్చనీయాంశమైంది. అంటే జనతా టీమ్ తో ఏదో విభేదాల కారణంగా ఈమె రాలేదనే విషయం దాదాపు కన్ఫామ్ అయినట్లే.

తాజాగా వినిపిస్తున్న న్యూస్ ఏంటంటే.. తెలుగు వర్షన్ ఆడియో రిలీజ్ కు రాలేకపోయిన సమంత.. మలయాళ వర్షన్ ఆడియో లాంచ్ కు వెళుతుందట. నిజంగా ఆమె అలా వెళ్ళడం వలన ఏమైనా యూజ్ ఉందంటారా? మన దగ్గర తమిళ డబ్బింగ్ సినిమాల ఆడియో లాంచ్ కు ఎవరైనా పరిచయంలేని తమిళ హీరోయిన్ వస్తే.. ఎలా ఉంటుంది? ఇప్పుడు సమంత మలయాళం వెళ్లినా అలాగే ఉంటుంది. సినిమా ప్రమోషన్ కు సమంత ప్రెజన్స్ అనేది మలయాళంలో ఏ మేరకు ప్లస్ అవుతుందో.. ప్రమోషన్లలో కూడా అలాగే ఉంటుంది కథ. అసలు అక్కడ నిత్యా మీనన్ ఉండగా.. ఇంకా సమంత ఎందుకు అనే సందేహం మలయాళం వర్షెన్ సినిమాను కొనుక్కున్న పంపిణీదారులకు రాదంటారా?

అదేదో సమంత తెలుగు మీడియాతో ఇంటర్యూ కార్యక్రమాలు వంటివి మొదలెట్టి ఇక్కడే ఇంటరాక్ట్ అయితే బెటరేమో. ఆగస్టు ఆఖరి వారం నుండి ఎలాగో జనతా గ్యారేజ్ ప్రమోషన్లు మొదలవుతాయి కాబట్టి.. సమంత అప్పుడు మిస్సవ్వకుండా వస్తే మంచిది.