'బావ తాకితే'.. కిరణ్ - చాందినీల రొమాంటిక్ రెట్రో సాంగ్..!

గోపీనాథ్ రెడ్డి దర్శకత్వంలో యంగ్ అండ్ ఎనర్జిటిక్ హీరో కిరణ్ అబ్బవరం నటిస్తున్న మ్యూజికల్ రొమాంటిక్ ఎంటర్‌టైనర్ ''సమ్మతమే''. ఇందులో చాందిని చౌదరి హీరోయిన్ గా నటిస్తోంది. ఇప్పటికే విడుదలైన ఈ సినిమా టీజర్‌ కి అన్ని వర్గాల నుండి సానుకూల స్పందన వచ్చింది. అలానే 'కృష్ణ & సత్యభామ' 'బుల్లెట్ లా' వంటి రెండు పాటలు ప్రేక్షకులను అలరించాయి.

ఈ నేపథ్యంలో ఈరోజు శనివారం 'సమ్మతమే' సినిమా నుంచి 'బావ తాకితే' అనే థర్డ్ సింగిల్ లిరికల్ వీడియోని మేకర్స్ రిలీజ్ చేసారు. 'ఏంటో.. నా చుట్టూ ఉన్నవాళ్ళందరికీ పెళ్లిళ్లు అయిపోతున్నాయి.. ఒక్క నాకు తప్ప' అని కిరణ్ వాయిస్ ఓవర్ ఇవ్వడంతో ఈ పాట ప్రారంభమైంది.

'చిటపట చినుకులు కురిసెనులే.. ఎదలో అలజడి రేగే.. పడిపడి తపనలు తడిసెనులే.. తనువే తహతహలాడే..' అంటూ సాగిన ఈ రెట్రో సాంగ్ ఆకట్టుకుంటోంది. ఇది 80స్ స్టైల్ లో కిరణ్ అబ్బవరం మరియు చాందిని చౌదరి మధ్య రొమాన్స్‌ ను చూపుతుంది. కిరణ్ ఊహాలోకంలో ఇద్దరూ ఒకరిపై ఒకరు తమ ప్రేమను చాటుకోవడం ఈ పాటలో కనిపిస్తుంది.

కొరియోగ్రాఫర్స్ సుష్మా - సత్య సందీప్ - కృతి సిద్దార్థ్ కంపోజ్ చేసిన రెట్రో స్టెప్పులు బాగున్నాయి. మొత్తం మీద ఈ రెట్రో సాంగ్ విజువల్ ఫీస్ట్ గా ఉందని చెప్పాలి. 'బావ తాకితే' పాటకు శేఖర్ చంద్ర ట్యూన్ సమకూర్చగా.. సనాపతి భరద్వాజ పాత్రుడు సాహిత్యం అందించారు. సింగర్స్ మల్లికార్జున్ మరియు మాళవిక కలసి గోల్డెన్ డేస్ జ్ఞాపకాలను తిరిగి తీసుకొచ్చేలా ఈ గీతాన్ని ఆలపించారు.

'సమ్మతమే' చిత్రాన్ని యూజీ ప్రొడక్షన్స్ బ్యానర్ పై కంకణాల ప్రవీణ నిర్మిస్తున్నారు. సతీష్ రెడ్డి మాసం సినిమాటోగ్రఫీ అందిస్తుండగా.. విప్లవ్ నిషాదం ఎడిటింగ్ బాధ్యతలు నిర్వహిస్తున్నారు.

సుధీర్ మాచర్ల ఆర్ట్ డైరెక్టర్ గా వర్క్ చేస్తున్నారు. ఈ చిత్రాన్ని 2022 జూన్ 24న ప్రపంచ వ్యాప్తంగా థియేటర్లలో విడుదల చేయడానికి మేకర్స్ సన్నాహాలు చేస్తున్నారు.