సరైనోడికి సంపూ స్పూఫ్ వేశాడు?

బర్నింగ్ స్టార్ అంటూ సంపూర్ణేష్ బాబు చేసిన హంగామా అంతా ఇంతా కాదు. ఇప్పుడు కొంచెం తగ్గింది కానీ.. సంపూ చేసిన హృదయకాలేయం ఆన్ లైన్ లో బాగానే హంగామా చేసింది. థియేటర్లు కూడా బాగానే నిండడంతో.. ఈ ప్రాజెక్టు బాగానే వర్కవుట్ అయింది. ఈ సెటైరికల్ స్పూఫ్ కామెడీని జనాలు అదరించడంతో.. హృదయకాలేయం దర్శకుడు సాయి రాజేష్.. సంపూతోనే మరో సినిమా మొదలుపెట్టాడు.

కొబ్బరిమట్ట టైటిల్ తో తెరకెక్కుతున్న ఈ సినిమాని కూడా స్పూఫ్ లను బేస్ చేసుకునే తీస్తున్నారు. ఈ మూవీలో చాలా రకాల గెటప్ లలో సంపూర్ణేష్ కనిపించనున్నాడు. మొదట మోహన్ బాబు మూవీ పెదరాయుడుకి పేరడీ గెటప్ వేసిన సంపూ.. ఆ తర్వాత బాహుబలిని కూడా ఇమిటేట్ చేసేశాడు. ఇప్పుడు అల్లు అర్జున్ ని టార్గెట్ చేశాడు దర్శకుడు. బన్నీ నటించిన సరైనోడు చిత్రానికి ఫస్ట్ లుక్ కంటే ముందే.. ఆ పోస్టర్ లో కొంత భాగాన్ని రివీల్ చేస్తూ.. ఓ స్పెషల్ పోస్టర్ వేశారు. ఇప్పుడు అలాంటి పోస్టర్ నే సంపూర్ణేష్ కూడా ట్రై చేశాడు.

ఓ కాస్ట్లీ బైక్ పై కూర్చున్న వ్యక్తిని సగమే చూపించినా.. సంపూ యాజ్ ఆండ్రాయిడు అంటూ అసలు విషయం చెప్పేశారు. అంటే సరైనోడుని ఆండ్రాయిడుగా మార్చేశారన్న మాట. అప్పుడెప్పుడో పెదరాయుడు నుంచి మొదలుపెట్టి.. బాహుబలి - లేటెస్ట్ సరైనోడుని కూడా వదలడం లేదంటే.. ఈ సారి కూడా సంపూ హంగామా ఎక్కువగానే ఉండొచ్చన్న మాట.