గాలి జ‌నార్ధ‌న‌ రెడ్డి తో సంపూకి ఏం ప‌ని?

స‌దా మీ ప్రేమ‌కి బానిస‌ని... అంటూ డైలాగ్ కొట్టే సంపూర్ణేష్ బాబు ఇప్పుడు గనుల గాలి జ‌నార్ధ‌న‌రెడ్డి ఆతిథ్యానికి బానిస‌నయ్యా అంటున్నాడు. ఎవ‌రూ ఊహించ‌ని రీతిలో సంపూ గాలితో క‌లిసి ఉండ‌టాన్ని చూసి అంతా షాక్ అవుతున్నారు. గాలికి షేక్ హ్యాండ్ ఇస్తూ ఓ ఫొటోని తీయించుకొన్న సంపూ దాన్ని ట్విట్ట‌ర్‌ లో పోస్ట్ చేశాడు. బెంగుళూరులో గాలి జ‌నార్ధ‌న‌రెడ్డిని క‌లిశా అని పేర్కొన్నాడు. అది చూసిన‌వాళ్లంతా గాలితో సంపూకి ఏం ప‌ని? అని ఆరా తీయ‌డం మొద‌లుపెట్టారు. సినిమా షూటింగ్‌ లో భాగంగా వెళ్లిన‌ప్పుడు అక్క‌డ స‌ర‌దాగా గాలితో క‌లిశాడా? లేక ప‌నిగ‌ట్టుకొని ఆయ‌న ద‌గ్గ‌రకి వెళ్లాడా? అన్న‌ది తేలాల్సి వుంది.

ఒక‌ప్పుడు క‌ర్ణాట‌క రాజ‌కీయాల్ని శాసించిన గాలి జ‌నార్ధ‌నరెడ్డికి తెలుగు రాష్ట్రాల్లోని రాజ‌కీయ నాయ‌కుల‌తో పాటు, తెలుగు చిత్ర ప‌రిశ్ర‌మ‌తోనూ మంచి అనుబంధం ఉంది. ఆయ‌న ఇదివ‌ర‌కు ప‌లు తెలుగు సినిమా వేడుక‌ల్లో పాల్గొన్నారు కూడా. సంపూ సినిమాకి గాలి ఆర్థికంగా అండ‌దండ‌లు అందిస్తున్నాడేమో అన్న డౌట్ వ్య‌క్త‌మ‌వుతోంది. ప్ర‌స్తుతం సంపూ `కొబ్బ‌రిమ‌ట్ట‌` అనే సినిమాలో న‌టిస్తున్నాడు. ఇటీవ‌లే ఆ సినిమా మొద‌లైంది. ఆ సినిమా ప‌నుల్లో భాగంగానే సంపూ వెళ్లి గాలిని క‌లిసుండొచ్చ‌ని అంటున్నారు. అక్ర‌మ గ‌నుల కేసులోనూ, బెయిల్ కుంభ‌కోణంలోనూ గాలి జ‌నార్ధ‌న‌రెడ్డి కొన్నేళ్ల‌పాటు జైల్లో గ‌డిపారు. ఇటీవ‌లే ఆయ‌న బెయిల్‌ పై విడుద‌ల‌య్యాడు. బెంగుళూరులోని ఆయ‌న సొంతింట్లోనే సంపూ కలిశాడు.