మిస్టర్‌ సూర్యా.. సంపూని చూసి నేర్చుకో

పోలీస్‌ పాత్రలో రౌద్రం ఎలా చూపించాలో 'సింగం' సినిమా చూసి తెలుసుకోవాలని అంటుంటారు చాలామంది. సూర్య అంతగా విజృంభించాడు సింగం సిరీస్‌లో. ఐతే సూర్య ఇకపై ఎప్పుడైనా పోలీస్‌ పాత్రలు వేసినా కూడా ముందు సంపూను చూసి చాలా నేర్చుకోవాల్సి ఉంటుంది. కావాలంటే తన కొత్త సినిమా 'సింగం 123' కోసం సంపూ ఇచ్చిన ఎక్స్‌ప్రెషన్స్‌ ఓసారి చూడండి. బర్నింగ్‌ స్టార్‌ ఎలా రెచ్చిపోయాడో తెలుస్తుంది.

ఆ నాలుక మడతెట్టిన ఎక్స్‌ప్రెషన్‌ చూస్తే చాలు.. విలన్లందరూ గడగడలాడిపోవాల్సిందే. పిడికిలి బిగించి చూస్తున్న ఓర చూపు గురించైతే ఎంత చెప్పినా తక్కువే. ఇక మీ అంతు చూస్తాన్రోయ్‌ అంటూ సింహంలా పంజా విసురుతూ నోరు తెరిచి అరుస్తున్న స్టిల్‌ చూస్తే ఎవరికైనా మతులు పోవాల్సిందే. సూర్య కూడా సింగం, సింగం-2 సినిమాల కోసం ఫొటో షూట్‌లు చేశాడు. కానీ సంపూ షూట్‌ ముందు అవన్నీ దిగదుడుపే.

ఇండియాస్‌ బిగ్గెస్ట్‌ కాప్‌ స్టోరీ అనే క్యాప్షన్‌తో వస్తున్న 'సింగం 123'కి అక్షత్‌ అజయ్‌ శర్మ అనే ఫిలిం ఇన్‌స్టిట్యూట్‌ విద్యార్థి దర్శకత్వం వహిస్తున్నాడు. మంచు విష్ణు స్వయంగా ఈ సినిమాకు కథ, స్క్రీన్‌ప్లే అంందించి తన బేనర్లోనే నిర్మిస్తున్నాడు. ఈ బుధవారమే సింగం 123 ట్రైలర్‌ విడుదల కాబోతోంది. ఈ నేపథ్యంలోనే ఈ ఫొటో షూట్‌తో సందడి చేశారు. ట్రైలర్‌ కోసం వెయిట్‌ అండ్‌ సీ.