రాజమౌళికి అంకితం.. పాపారాయుడు

బర్నింగ్ స్టార్ సంపూర్ణేష్ బాబు ఏడాది చివరి రోజు బ్యాంగ్ బ్యాంగ్ పోస్టర్ తో వచ్చాడు. తన కొత్త సినిమా ‘కొబ్బరి మట్ట’లో పాపారాయుడి పాత్రను జనాలకు పరిచయం చేశాడు. వామనుడి తరహాలో ఉన్న సంపూను చూస్తుంటే బాలనటుడిగా చేసిన కమెడియన్ భరత్ గుర్తుకొస్తున్నాడు. గెటప్ సాత్వికంగానే ఉంది కానీ.. సంపూ రౌద్రం మాత్రం మామూలుగా లేదు. ‘‘ఆరడుగుల ఆజానుబాహుడు.. శత్రువుల గుండెల్లో యముడు.. ఈ పాపారాయుడు’’ అంటూ బిల్డప్ భారీగానే ఇచ్చారు.

ఈ పోస్టర్ని దర్శక ధీరుడు రాజమౌళికి అంకితమిచ్చాడు సంపూ. మన బర్నింగ్ స్టార్ ఫేస్ బుక్ లో ఎక్కువమందికి పరిచయం కావడానికి రాజమౌళి ఇచ్చిన కాంప్లిమెంటే కారణమన్న సంగతి తెలిసిందే. ఇక ‘కొబ్బరి మట్ట’ విషయానికొస్తే.. ఇందులో సంపూ పాపారాయుడు, పెదరాయుడు, ఆండ్రాయుడు అనే మూడు భిన్నమైన పాత్రలు పోషిస్తున్నాడు.

‘హృదయకాలేయం’ దర్శకుడు స్టీఫెన్ శంకర్ ఈ చిత్రానికి కథ, స్క్రీన్ ప్లే, మాటలు అందించగా.. రూపక్ రొనాల్డ్ సన్ దర్శకత్వం వహిస్తున్నాడు. హృదయ కాలేయం, ఈ రోజుల్లో సినిమాల్ని నిర్మించిన వాళ్లే ఈ చిత్రానికీ నిర్మాతలు. సంపూ సరసన ఇందులో ముగ్గురు హీరోయిన్లు కూడా ఉంటారట. మార్చిలో ఈ చిత్రాన్ని విడుదల చేయబోతున్నట్లు ఈ రోజు విడుదల చేసిన పోస్టర్లో పేర్కొన్నారు. ఐతే సంపూ పేరడీ వేషాలు, బిల్డప్పులు ఇప్పటికే జనాలకు మొహం మొత్తేసిన నేపథ్యంలో మరోసారి ఆ తరహా వేషాలతో వస్తున్న ఈ సినిమా ప్రేక్షకుల్ని ఏమేరకు ఆకట్టుకుంటుందో చూడాలి.