‘శీలో రక్షతి రక్షితః’ ఇది సంపూ కాప్షన్

ధర్మో రక్షతి రక్షితః’ అనే వాక్యం వాల్మీకి రచించిన రామాయణంలోని ఒక శ్లోకంలోనిది. జనాల్లోకి వెళ్లి పాపులరైన వాక్యాలలో ఇది ఒకటి. ఈ వాక్యం యొక్క అర్ధం "ధర్మాన్ని మనం రక్షిస్తే ఆ ధర్మం మనల్ని రక్షిస్తుంది". ఇప్పుడు దీన్నే కొద్దిగా మార్చి ‘శీలో రక్షతి రక్షితః’ అంటున్నాడు సంపూర్ణేష్ బాబు. అంటే "శీలాన్ని మనం రక్షిస్తే ఆ శీలమే మనల్ని రక్షిస్తుంది" అని అర్దం. మరి సెటైర్ గా ఈ వాక్యం అన్నారో,బాగుందని వాడారో ఆయన లేటెస్ట్ ఫిల్మ్ చూస్తేనే తెలుస్తుంది.

తెలుగు సినిమాల్లో వస్తున్న మూస ధోరణిలపై సెటైర్ గా వచ్చిన 'హృదయకాలేయం' అప్పట్లో సెన్సేషన్. ముఖ్యంగా ఆ సినిమాని సోషల్ మీడియాలో ప్రమోట్ చేసిన తీరు, రాజమౌళి ట్వీట్ అన్ని కలిసొచ్చాయి. ఆ తర్వాత వరసగా సంపూ సినిమాలు చేస్తున్నారు కానీ ఏదీ వర్కవుట్ కావటం లేదు. మినిమం కామెడీగా కూడా మిగలటం లేదు. ఉన్నంతలో ‘కొబ్బరి మట్ట’ సినిమా బాగుందనిపించుకుంది. 'హృదయకాలేయం' తర్వాత అతనికి ఓ వర్గంలో ఫ్యాన్ ఫాలోయింగ్ సైతం ఏర్పడింది. అదీ మెల్లిగా పలచబడిపోయింది.అల్లరి నరేష్ కు ఆల్టర్నేటివ్ అవుతాడు అనుకుంటే అంత సీన్ లేదు అన్నట్లు అయ్యింది.

అయితే అందుకు కారణం అతనితో కామెడీ సినిమా చేద్దామనుకునే వాళ్లే కానీ, అతను ఏ జోనర్ ఫిల్మ్ లకు సెట్ అవుతాడు అన్నది ఆలోచించే ప్లాన్ చేసేవాళ్లు కరవు అవటమే ఫెయిల్యూర్స్ కు కారణం అనిపిస్తుంది. తాజాగా తన పుట్టిన రోజు సందర్బంగా ‘క్యాలీఫ్లవర్‌’ అంటూ మరో కామెడీ సినిమాని ప్రకటించాడు. . ఫస్ట్‌లుక్‌లో సంపూర్ణేశ్‌బాబు ఆంగ్లేయుడిగా గుర్రంపై స్వారీ చేస్తూ కనిపిస్తున్నాడు. టైటిల్‌తో పాటు ట్యాగ్‌లైన్ ‘శీలో రక్షతి రక్షితః’ కూడా కొత్తగా ఇంట్రస్టింగ్ గా ఉంది.

పూర్తి ఎంటర్టైనర్ చిత్రంగా రూపొందనున్న ఈ చిత్రాన్ని ఆర్.కె మలినేని దర్శకత్వంలో ఆశాజ్యోతి గోగినేని నిర్మిస్తున్నారు. గూడురు శ్రీధర్ సమర్పకునిగా వ్యవహరించనున్నారు. వాసంతి హీరోయిన్ గా నటించే ఈ సినిమాకు ప్రజ్వల్ క్రిష్ సంగీతం అందిస్తున్నారు. ముజీర్ మాలిక్ కెమెరామేన్ గా వ్యవహరిస్తున్న ఈ సినిమా ఇటీవల లాంఛనంగా మొదలైంది. పోసాని, పృధ్వీ, నాగమహేశ్, గెటెప్ శ్రీను, రోహిణి, కాదంబరి కిరణ్‌, విజయ్, కళ్యాణి ఇందులో ఇతర ముఖ్య పాత్రధారులు. మరి ఈ సినిమా తో అయినా సంపూ ఒడ్డున పడతాడో లేదోచూడాలి. ‘క్యాలీఫ్లవర్‌’ నవ్విస్తే మరిన్ని నవ్వులు పువ్వులు వస్తాయి.