టీజర్ టాక్: మరోసారి అలాంటి థ్రిల్లర్

మొన్నామధ్యన '16' సినిమాతో వచ్చిన దర్శకుడు కార్తిక్ నారేన్ ఇప్పుడు మరో సినిమాతో వస్తున్నాడు. అయితే ఈసారి మనోడి సినిమాను ఏకంగా గౌతమ్ మీనన్ నిర్మిస్తుండటంతో.. ఆ సినిమాకు ఇంకా హైప్ వచ్చింది. ''నరగసూరన్'' అంటూ రూపొందుతన్న ఈ సినిమా టీజర్ ఇప్పుడు రిలీజైంది. పదండి ఎలా ఉందో చూద్దాం.

అరవింద్ స్వామి.. సందీప్ కిషన్.. శ్రీయ.. మరియు ఇంద్రజిత్ సుకుమారన్ కీలక పాత్రల్లో రూపొందిన ఈ సినిమా కూడా ఒక థ్రిల్లర్ తరహాలోనే ఉంది. ఎప్పుడో తను చేసిన తప్పుడు పనులన్నీ మానేసిన ఒక మాఫియా డాన్.. ఇప్పుడు మళ్ళీ బ్యాక్ కి వస్తే ఏంటి పరిస్థితి అనే నేపథ్యంలో.. ఒక థ్రిల్లర్ తరహాలో ఈ సినిమాను రూపొందించారు. అయితే ఇందులో అర్వింద్ స్వామి ఏ పాత్ర చేస్తున్నాడు.. సందీప్ రోల్ ఏంటి.. శ్రీయ ఏ పాత్రను చేస్తోంది అనేది ఇప్పుడే చెప్పడం కష్టం. కాకపోతే మొదటి సినిమాతో అదరగొట్టని కార్తీక్.. ఇప్పుడు ఖచ్చితంగా మరోసారి చాలా ఆసక్తికరంగా ఉండే థ్రిల్లర్ ను తీస్తాడనే అనిపిస్తోంది.

అయితే సినిమా టీజర్ ను చూస్తే మాత్రం.. బ్యాగ్రౌండ్ స్కోర్ అండ్ విజువల్స్ మాత్రం అదిరిపోయాయ్. '16' సినిమాలో ఎలాంటి థ్రిల్లింగ్ ఫీల్ ఉందో.. ఇప్పుడు కూడా అదే తరహాలో ఫీల్ ఉండే ఛాన్సుంది. చూద్దాం సినిమా ఎలా ఉండబోతుందో. వచ్చే ఏడాది మొదట్లో సినిమా రిలీజ్ చేస్తామంటూ నిర్మాత గౌతమ్ మీనన్ చెబుతున్నాడు. అది సంగతి.