లావ‌ణ్య పైనే ఫోక‌స్...ఏ1 ఏమ‌య్యాడు?

యంగ్ హీరో సందీప్ కిషన్ కు ఇటీవ‌ల‌ స‌క్సెస్ అంద‌ని ద్రాక్ష‌గాగే మిగిలిపోయింది. ఛాన్సులైతే వ‌స్తున్నాయి గానీ.. స‌క్సెస్ ముఖం చాటేస్తోంది. ద‌ర్శ‌క‌నిర్మాత‌ల‌ తో చొర‌వ చూపిస్తూ యంగ్ హీరోల‌ లో గ్యాప్ లేకుండా సినిమాలు చేసే స్టార్ ఎవ‌రైనా ఉన్నారా అంటే అది సందీప్ అనే చెబుతారు. జ‌యాప‌జ‌యాల‌ తో ప‌నిలేకుండా బండి న‌డిపించ‌డ‌మే ప‌ర‌మావ‌దిగా త‌న ప‌ని తాను చేసుకుంటూ వెళ్లిపోతున్నాడు. మ‌రి ఫెయిల్యూర్స్ కి కారణాలు ఏమిట‌నేది రివ్యూ చేసుకుంటున్నాడా లేదా? ఈసారి మాత్రం `ఏ1 ఎక్స్ ప్రెస్` అంటూ క్రీడా నేప‌థ్యం ఉన్న కాన్సెప్ట్ ని ఎంచుకున్నాడు. మ‌రి ఈ సినిమా సీనేమిటి? అన్న‌ది ఇప్ప‌టికి స‌స్పెన్స్.

హాకీ నేప‌థ్యంలో తెర‌కెక్కుతున్న `ఏ1 ఎక్స్ ప్రెస్` త‌న‌కో బిగ్ బ్రేక్ ఇస్తుంద‌ని సందీప్ ఆశిస్తున్నాడు. ఇందులో అత‌డు హాకీ ప్లేయ‌ర్ గా క‌న‌పించ‌నున్నాడు. ఈ పాత్ర కోసం కొన్ని నెల‌ల పాటు హాకీ ట్రైనింగ్ తీసుకున్నాడు. క్రీడాకారుని పాత్ర‌కు అవ‌స‌ర‌మైన అహ‌ర్యం కోసం నిరంత‌రం శ్ర‌మిస్తూ క‌మిట్ మెంట్ తో ఉన్నాడ‌ట‌. ఇందులో క‌థానాయిక‌గా లావణ్య త్రిపాఠి న‌టిస్తోంది.అయితే ఈ సినిమా ప్ర‌చారంలో భాగంగా యూనిట్ లావ‌ణ్య పైనే ఫోక‌స్ పెట్టి ప్ర‌మోట్ చేస్తుండ‌డం వేడెక్కిస్తోంది.

సోష‌ల్ మీడియా అంత‌టా లావ‌ణ్య మ‌యం అయిపోయింది. ఇంత‌కీ సందీప్ ఏమ‌య్యాడు? అన్నంతగా అమ్మ‌డి పేరు మార్మోగుతోంది. మ‌రి ఈ సీన్ చూస్తుంటే సందీప్ కావాల‌నే ప్ర‌చారానికి దూరంగా ఉన్నాడా? లేక ఇంకేదైనా కార‌ణం వ‌ల్ల‌ స్కిప్ కొడుతున్నాడా? అన్న‌ది తెలియాల్సి ఉంది. కార‌ణాలు ఏవైనా వ‌రుస ప్లాపుల్లో ఉన్న‌ సందీప్ ఇలా బ్రేక్ తీసుకోవ‌డం మంచిదేన‌ని.. అది సినిమాకు క‌లిసొస్తుంద‌ని కొంద‌రు త‌మ‌దైన శైలిలో సెటైర్లు వేస్తున్నారు.S