సత్యం రాజు కోడలు సినిమాల్లోకి..

‘సత్యం’ రామలింగరాజు కుటుంబ సభ్యుల గురించి బయటి ప్రపంచానికి తెలిసింది చాలా తక్కువ. సత్యం అద్భుత ప్రస్థానం సాగుతున్న రోజుల్లో కానీ.. ఆ సంస్థంకు సంబంధించిన కుంభకోణం బయటపడ్డాక కానీ రామలింగరాజే వార్తల్లో వ్యక్తి. ఈ కుంభకోణం పుణ్యమా అని ఆయన తమ్ముడు కూడా జనాలకు పరిచయమయ్యాడు. కొన్నేళ్లుగా సత్యం ఫ్యామిలీ గురించి నెగెటివ్ విషయాలే వింటున్నాం. ఐతే ఈ ఫ్యామిలీ నుంచి ఓ వ్యక్తి ఓ పాజిటివ్ న్యూస్ తో వార్తల్లోకి వస్తున్నారు. ఆ వ్యక్తి మరెవరో కాదు.. రామలింగ రాజు కోడలు సంధ్య రాజు.

ఇటీవలే ‘కాల్ హెల్త్’ పేరుతో మెడికల్ సర్వీసెస్ ఆరంభించి విజయవంతమైన సంధ్య రాజు.. త్వరలోనే సినీ అరంగేట్రానికి సిద్ధమవుతుండటం విశేషం. సంధ్య రామలింగరాజు కోడలు మాత్రమే కాదు.. రాంకో సిస్టమ్స్ వ్యవస్థాపకుడు వెంకట్రామరాజు కూతురు కూడా. చిన్నప్పటి నుంచే క్లాసికల్ డ్యాన్స్ లో శిక్షణ తీసుకుని.. ఎన్నో ప్రదర్శనలు కూడా ఇచ్చిన సంధ్య రాజు.. ఓ నృత్య ప్రధానమైన సినిమాతో తెరంగేట్రం చేయబోతోంది. ఈ సినిమాకు సంబంధించి పూర్తి వివరాలు వెల్లడవాల్సి ఉంది. ఐతే ఓ క్లాసికల్ డ్యాన్సర్ పెళ్లి తర్వాత తన కళను పక్కనబెట్టేయడం.. కొన్నేళ్ల తర్వాత తిరిగి నాట్యంలోకి ప్రవేశించి ఉన్నత శిఖరాల్ని అందుకోవడం.. ఈ నేపథ్యంలో కథ సాగుతుందట. ఈ సినిమా విశేషాలకు సంబంధించి త్వరలోనే ప్రెస్ మీట్ పెట్టబోతున్నారు.