'ఎఫ్ 3'లో కీలకమైన పాత్రలో సంగీత?

తెలుగు తెరపై ముద్దమందారంలా విరిసిన సౌందర్యం పేరే 'సంగీత'. అందానికీ .. ఆకర్షణీయమైన రూపానికి ఆమెను ఉదాహరణగా చూపించవచ్చు. గ్లామర్ పరంగా .. నటన పరంగా కావలసిన లక్షణాలు పుష్కలంగా ఉండటంతో, తెలుగుతో పాటు తమిళ .. మలయాళ భాషల్లో పదేళ్ల పాటు హీరోయిన్ గా అలరించింది. అలా ఎంతోమంది అభిమానులను సంపాదించుకున్న సంగీత, ఆ తరువాత కేరక్టర్ ఆర్టిస్ట్ గా రీ ఎంట్రీ ఇచ్చింది. పెద్దగా గ్యాప్ ఇవ్వకుండా తన కెరియర్ ను నెట్టుకొస్తోంది.

రీ ఎంట్రీలో ఎక్కువగా తమిళ సినిమాలు చేస్తూ వచ్చిన సంగీత, అనిల్ రావిపూడి దర్శకత్వం వహించిన 'సరిలేరు నీకెవ్వరు'లో మెరిసింది. రావు రమేశ్ కి భార్యపాత్రలో .. రష్మికకి తల్లి పాత్రలో మెప్పించింది. ఈ పాత్రలో ఆమె కామెడీ చేయడమే కాదు, ఒక పాటకు రష్మికతో కలిసి స్టెప్స్ కూడా వేసింది. సంగీత గ్లామర్ లో పెద్దగా మార్పు లేకపోవడం .. ఆ పాత్ర బాగా పేలడం వలన ఆమెకి మంచి గుర్తింపు వచ్చింది. దాంతో అవకాశాలు కూడా వెతుక్కుంటూ వస్తున్నాయట.

సంగీత కూడా తెలుగు సినిమాలపై ప్రత్యేక శ్రద్ధ పెట్టినట్టుగా కనిపిస్తోంది. 'ఆచార్య' సినిమాలో ఆమె ఒక ముఖ్యమైన పాత్రలో నటిస్తోంది. ఈ పాత్ర ఆడియన్స్ కి బాగా కనెక్ట్ అవుతుందనే ఆశతో ఆమె ఉంది. ఈ నేపథ్యంలోనే ఆమె 'ఎఫ్ 3' సినిమాలోనూ ఒక ముఖ్యమైన పాత్రలో కనిపించనుందనే టాక్ బలంగా వినిపిస్తోంది. 'సరిలేరు నీకెవ్వరు'లో స్వరాజ్యం పాత్రకి ఆమె న్యాయం చేసిన తీరు నచ్చడంతో, అనిల్ రావిపూడి మళ్లీ ఛాన్స్ ఇచ్చాడని అంటున్నారు. అదే నిజమైతే ఈ సినిమాలో ఆమె పాత్ర తీరుతెన్నులు ఎలా ఉంటాయో చూడాలి మరి!