పెళ్లి కూతురితో దిగిన ఫోటో పోస్టు చేసిన సానియా

హైదరాబాద్ కు చెందిన రెండు ప్రముఖ క్రీడా కుటుంబాలు ఈ వారంలో జరిగే పెళ్లి వేడుకతో బంధువులు కానున్నారు. టీమిండియాకు ఒకప్పుడు కెప్టెన్ గా వ్యవహరించిన అజరుద్దీన్ కుమారుడికి.. ప్రముఖ టెన్నిస్ స్టార్ సానియామీర్జా సోదరి ఆనంమీర్జాలు పెళ్లితో ఒకటి కానున్న వేళ.. పెళ్లి సందడి ఎంతన్న విషయాన్ని తాజాగా పోస్టు చేసిన ఫోటోతో చెప్పింది సానియా.

పింక్ కలర్ టాప్ స్కర్టుతో అందంగా ఉన్న పెళ్లికుమార్తె ఆనంమీర్జాతో సానియా దిగిన ఫోటోను సోషల్ మీడియాలో పోస్టు చేసింది. ఆనంమీర్జా స్టైలీష్ గా పని చేస్తుంటే.. అజరుద్దీన్ కుమారుడు అసద్ న్యాయవాదిగా పని చేస్తున్నారు. ఈ వారంలో జరిగే తన పెళ్లికి సంబంధించి సోషల్ మీడియాలో పెళ్లికుమార్తె కూడా ఒక పోస్టు పెట్టారు.

మంచి స్నేహితులైన కుటుంబసభ్యుల్ని పొందుతుండటం తనకెంతో థ్రిల్ గానూ.. ఆనందంగానూ ఉన్నట్లు పేర్కొన్నారు. అజారుద్దీన్ కుమారుడితో తన సోదరి వివాహం జరుగుతున్నట్లుగా అక్టోబరులో వెల్లడించారు. మొత్తానికి ప్రముఖ ఇంట జరిగే పెళ్లి కారణంగా సోషల్ మీడియాలో ఆ హడావుడి కనిపించకమానదు.