తెలుగు చిత్రంలో విల‌న్‌గా సంజ‌య్ ద‌త్‌

`బాహుబ‌లి` త‌రువాత యావ‌త్ భార‌తీయ సినిమా టాలీవుడ్ వంక ఆస‌క్తిగా చూడ‌టం మొద‌లుపెట్టింది. ప్రాంతీయ భాషా చిత్రాలంటే గ‌తంలో చిన్న చూపు చూసిన బాలీవుడ్ స్టార్స్ ఇప్ప‌డు టాలీవుడ్ చిత్రాల్లో చిన్న పాత్ర ల‌భించినా చేయ‌డానికి సై అంటూ ముందుకొస్తున్నారు. మ‌న వాళ్ల‌కి ఆఫ‌ర్లు ఇస్తున్నారు. ప్ర‌స్తుతం త్రివిక్ర‌మ్ - సూప‌ర్ స్టార్ మ‌హేష్ ల క‌ల‌యిక‌లో రానున్న సినిమాలో ఓ బాలీవుడ్ స్టార్ విల‌న్ గా న‌టించ‌డానికి గ్రీన్ సిగ్న‌ల్ ఇచ్చేసిన‌ట్టుగా వార్త‌లు వినిపిస్తున్నాయి.

`ఖ‌లేజా` త‌రువాత కొంత విరామం తీసుకున్న మ‌హేష్ - త్రివిక్ర‌మ్ ల కాంబినేష‌న్ మ‌ళ్లీ ఇన్నేళ్ల‌కు క‌లిసి ఓ భారీ చిత్రానికి వ‌ర్క్ చేస్తున్న విష‌యం తెలిసిందే. హారిక అండ్ హాసిని క్రియేష‌న్స్ బ్యాన‌ర్‌పై భారీ చిత్రాల నిర్మాత ఎస్‌. రాధాకృష్ణ ఈ చిత్రాన్ని నిర్మిస్తున్నారు. ఇటీవ‌లే ఈ చిత్రానికి సంబంధించిన అఫీషియ‌ల్ అనౌన్స్ మెంట్ కి సంబంధించిన టీజ‌ర్ ని మేక‌ర్స్ రిలీజ్ చేసిన విష‌యం తెలిసిందే. ప్ర‌స్తుతం ఈ చిత్రానికి సంబంధించిన ప్రీ ప్రొడ‌క్ష‌న్ వ‌ర్క్ ఫుల్ స్వింగ్ లో వుంది.

త్వ‌ర‌లో సెట్స్ పైకి రానున్న ఈ మూవీలో బాలీవుడ్ బ్యాడ్‌మెన్ సంజ‌య్ ద‌త్ విల‌న్ గా న‌టిస్తున్నార‌ని తెలిసింది. ఇప్ప‌టికే ఆయ‌న‌తో త్రివిక్ర‌మ్ సంప్ర‌దింపులు జ‌ర‌ప‌డం.. సంజ‌య్ ద‌త్ కూడా ఈ చిత్రంలో న‌టించ‌డానికి సుముఖ‌త‌ని వ్య‌క్తం చేయ‌డం చ‌క చ‌కా జ‌రిగిపోయిన‌ట్టుగా తెలుస్తోంది. ప్ర‌స్తుతం `కేజీఎఫ్ చాప్ట‌ర్ 2`లో అధీరాగా న‌టించిన సంజ‌య్ ద‌త్ గ‌తంలో క్రియేటివ్ డైరెక్ట‌ర్ కృష్ణ‌వంశీ రూపొందించిన `చంద్ర‌లేఖ‌` చిత్రంలో చిన్న అతిథి పాత్ర‌లో మెరిసిన విష‌యం తెలిసిందే.