మరో సౌత్ హీరో సినిమాలో సంజయ్ దత్.. సాలీడ్ రెమ్యునరేషన్!

బాలీవుడ్ సీనియర్ స్టార్ హీరో సంజయ్ దత్ ప్రస్తుతం కథానాయకుడుగా కాకుండా ఎక్కువగా నెగటివ్ షేడ్స్ ఉన్న పాత్రలు చేయడానికి ఇష్టపడుతున్నాడు. అప్పుడప్పుడు పాజిటివ్ సపోర్టింగ్ రూల్స్ కూడా చేస్తున్నాడు కానీ అవేమి అంతగా క్లిక్ కావడం లేదు. అయితే అతనికి ఎక్కువగా బాలీవుడ్ లో కంటే ఇప్పుడు సౌత్ ఇండస్ట్రీలోనే మంచి డిమాండ్ ఏర్పడింది. ముఖ్యంగా కేజిఎఫ్ 2 సినిమాలో అతను చేసిన అదిరా పాత్ర ఏ స్థాయిలో క్లిక్ అయిందో ప్రత్యేకంగా చెప్పడం అవసరం లేదు.

ఇక ఆ సినిమానంతరం సౌత్ ఇండస్ట్రీలో సంజయ్ దత్ కు ఆఫర్లు అయితే వస్తున్నాయి. అయితే ఈ స్టార్ నటుడు మాత్రం తొందరపడకుండా పెద్ద ప్రాజెక్ట్ లకు అలాగే బలమైన పాత్ర ఉంటేనే సినిమా చేసేందుకు ఒప్పుకుంటున్నాడు.

నెగిటివ్ పాత్ర అయినా పరవాలేదు కానీ అది సినిమాలో చాలా ఇంపాక్ట్ చూపించాలి అని కూడా ఆలోచిస్తున్నాడు. ఇక సౌత్ ఇండస్ట్రీలో ఇప్పుడు హాట్ టాపిక్ గా మారుతున్న డైరెక్టర్ లోకేష్ కనగరాజ్ కూడా సంజయ్ దత్ ను సంప్రదించినట్లు తెలుస్తోంది.

అతను విక్రమ్ సినిమాతో భారీ విజయాన్ని అందుకోవడంతో ఇప్పుడు సౌత్లోనే కాకుండా నార్త్ లో కూడా మంచి క్రేజ్ అందుకున్నాడు. దీంతో తదుపరి సినిమా మాత్రం ఫ్యాన్ ఇండియా రేంజ్ కు తగ్గట్టుగా ఉండాలి అని డిసైడ్ అయ్యాడు. ఇక నెక్స్ట్ సినిమా విజయ్ తో చేయబోతున్న విషయం తెలిసిందే. తలపతి 67వ ప్రాజెక్టుగా తెరపైకి రాబోతున్న ఆ సినిమాలో విజయ్ నాలుగు పదుల వయసున్న ఒక పవర్ఫుల్ గ్యాంగ్ స్టార్ గా కనిపించబోతున్నాడు.

రజినీకాంత్ భాషా స్టైల్ లో ఉండబోయే ఆ సినిమాలో ప్రముఖ యాక్టర్స్ కనిపించబోతున్నారు. ఇక అందులో భాగంగానే పవర్ ఫుల్ విలన్ కోసం సంజయ్ ను ఫిక్స్ చేసే ఆలోచనలో ఉన్నట్లు తెలుస్తోంది. మరొక ముఖ్యమైన పాత్ర కోసం మలయాళం ప్రముఖ నటుడు పృథ్వీరాజ్ ను కూడా సంప్రదించారట. ఇక సంజయ్ ను ఒప్పించేందుకు లోకేష్ టీం గట్టిగానే ప్రయత్నాలు చేసినట్లుగా తెలుస్తోంది. అతనికి దాదాపు పది కోట్ల పారితోషికం కూడా ఆఫర్ చేసినట్లు సమాచారం.

దర్శకుడు లోకేష్ కూడా విక్రమ్ సినిమాతో మంచి డైరెక్టర్ గా గుర్తింపు అందుకోవడంతో తలపతి 67వ సినిమాపై మాత్రం అంచనాలు ఒక్కసారిగా పెరిగిపోయాయి. ఇక సంజయ్ దత్ ను ఎలా ప్రజెంట్ చేస్తారో చూడాలి.

నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.