జైలు జీవి.. కొత్త సినిమా ఫిక్స్

నాలుగేళ్ల పాటు జైల్లో ఉండి వచ్చాడు స్టార్ హీరో సంజయ్ దత్. జైలు శిక్ష ముగించుకుని వచ్చాక ఎక్కువగా కుటుంబంతో గడపడానికే ప్రాధాన్యిమిస్తున్నాడు దత్. అతడి తర్వాతి సినిమా కోసం అభిమానులు ఆసక్తిగా ఎదురు చూస్తున్నారు. ఐతే ఎట్టకేలకు సంజు భాయ్ తన తర్వాతి సినిమాకు గ్రీన్ సిగ్నల్ ఇచ్చాడు. ‘జల్’ అనే సినిమాతో అంతర్జాతీయ స్థాయిలో ప్రశంసలు అందుకున్న గిరీష్ మాలిక్ ఈ చిత్రానికి దర్శకత్వం వహిస్తాడు. ‘తొర్బాజ్’ పేరుతో ఈ సినిమా తెరకెక్కనుంది. అఫ్ఘానిస్థాన్ యుద్ధ పరిస్థితుల నేపథ్యంలో తెరకెక్కే ఈ సినిమాలో సంజయ్ దత్ ఆర్మీ అధికారి పాత్రలో కనిపిస్తాడట.

చిన్నపిల్లల్ని ఆత్మాహుతి బాంబుగా మారుస్తున్న దారుణ పరిస్థితుల్ని ఇందులో చర్చించబోతున్నట్లు సమాచారం. కథాబలమున్న సినిమాల్లో నటించాలన్నది తన ఆలోచన అని.. అభిమానులకు గుర్తుండిపోయే సినిమాలే చేస్తానని.. ‘తొర్బాజ్’ అలాంటి సినిమానే అని సంజయ్ దత్ తెలిపాడు. వచ్చే ఏడాది ఈ సినిమా సెట్స్ మీదికి వెళ్తుంది. మరోవైపు సంజయ్ దత్ జీవిత గాథతో అగ్ర దర్శకుడు రాజ్ కుమార్ హిరాని తెరకెక్కించే సినిమాకు గ్రౌండ్ వర్క్ జరుగుతోంది. ఇందులో సంజయ్ పాత్రను రణబీర్ కపూర్ పోషిస్తాడు. ఈ సినిమాలో కూడా సంజయ్ ఓ క్యామియో రోల్ చేస్తాడని సమాచారం. త్వరలోనే ఈ చిత్రం షూటింగ్ మొదలవుతుంది.