ఆయన ఫోన్ రింగవుతూనే ఉందట

బాలీవుడ్ కు బయోపిక్ లు కొత్తేమీ కాదు. కానీ తాజాగా వస్తున్న ఓ బయోపిక్ మాత్రం అందరినీ ఆశ్చర్య పరుస్తోంది. బాలీవుడ్ బ్యాడ్ గయ్ గా పేరు తెచ్చుకున్న సంజయ్ దత్ జీవిత కథతో వస్తున్న సంజూ సినిమా ట్రయిలర్ రీసెంట్ గా విడుదలైంది. టీజర్ తోనే ఆకట్టుకున్న ఈ సినిమా ట్రయిలర్ చూశాక ఈ సినిమాపై అంచనాలు అమాంతం పెరిగిపోయాయి.

సంజయ్ దత్ జీవితంలో చూసినన్ని ఎత్తుపల్లాలు ఇంకెవరి జీవితంలోనూ ఉండవు. అండర్ వరల్డ్ తో అతడికున్న సంబంధాలూ దాచిపెట్టేవి కాదు. వీటన్నింటిని సినిమాలో దాచిపెట్టకుండా చూపించేస్తున్నారు. దీంతో ట్రయిలర్ చూసిన వాళ్లంతా సంజయ్ దత్ కు ఫోన్లు చేయడం మొదలెట్టారు. సంజూ ట్రయిలర్ రిలీజ్ అయిన మరుసటి క్షణం నుంచే సంజయ్ దత్ ఫోన్ రింగవుతూనే ఉందని అతడి సన్నిహితులు చెబుతున్నారు. జీవితంలోని డార్క్ సీక్రెట్స్ తో సహా దర్శకుడికి మొత్తం ఎలా చెప్పేశావు అని ఆశ్చర్యంతో అడిగిన వారే ఎక్కువగా ఉన్నారట.

ఈ సినిమాలో సంజయ్ తండ్రి సునీల్ దత్ పాత్రను పరేష్ రావెల్ చేశాడు. సోనమ్ కపూర్ - దియా మీర్జా హీరోయిన్లుగా నటించారు. నిన్నటి తరం హీరోయిన్ మనీషా కొయిరాలా ఓ ఇంపార్టెంట్ రోల్ చేసింది. రాజ్ కుమార్ హిరానీ డైరెక్ట్ చేసిన ఈ మూవీ జూన్ 29న థియేటర్లకు రానుంది.