ఆ హీరో కూతురి కాళ్లు విరగ్గొట్టేస్తానంటున్నాడు

సౌత్ ఇండియాలో హీరోల ఫ్యామిలీల నుంచి హీరోలు వస్తారే తప్ప.. హీరోయిన్లు రావడం అరుదు. ఐతే బాలీవుడ్ మాత్రం ఇందుకు భిన్నం. అక్కడ అమ్మాయిల్ని కూడా బాగానే ప్రోత్సహిస్తారు. కరిష్మా కపూర్.. కరీనా కపూర్.. సోనాక్షి సిన్హా.. సోనమ్ కపూర్ లాంటి వారసత్వ హీరోయిన్లకు అక్కడ మంచి ప్రోత్సాహమే లభించింది. వాళ్లు మంచి పేరు కూడా సంపాదించారు. ఐతే సీనియర్ నటుడు సంజయ్ దత్ కు మాత్రం తన కూతుర్ని హీరోయిన్ చేయడం ఎంతమాత్రం ఇష్టం లేదట. ఆమె సినిమాల్లోకి వచ్చి ఉంటే కాళ్లు విరగ్గొట్టేవాడినని ఆయన వ్యాఖ్యానించడం గమనార్హం.

తన కూతురు త్రిషాలాను పెద్ద ఉద్యోగంలో చూడాలన్నది సంజయ్ దత్ కల అట. అందుకోసం తాను చాలానే కష్టపడ్డానంటున్నాడు. బోలెండంత డబ్బు పెట్టి ఆమెను పెద్ద కాలేజీలో చేర్పించి ఉన్నత చదువులు చదివించానని.. ఆమె తన మాట ప్రకారమే చదువు పూర్తి చేసి.. పెద్ద ఉద్యోగంలో చేరిందని.. దాంతో పాటే ఫ్యాషన్ డిజైనింగ్ కూడా చేసిందని సంజయ్ తెలిపాడు. ఒకవేళ తన మాట కాదని త్రిషాలా సినిమాల్లోకి వస్తానంటే మాత్రం ఆమె కాళ్లు విరగ్గొట్టేవాడినని సంజయ్ దత్ అన్నాడు. సినీ పరిశ్రమ గ్లామరస్ గా కనిపిస్తుందని.. కానీ ఇక్కడ నెగ్గుకురావడం అంత సులభం కాదని సంజయ్ వ్యాఖ్యానించాడు. ఐతే తన కూతురి అభిరుచి ఏంటో తెలుసుకోకుండా తాను కోరుకున్నట్లే ఉద్యోగం చేయాలని సంజయ్ పట్టుబట్టడం ఎంత వరకు సమంజసం. ఒకవేళ ఆమెకు సినిమాల్లోకి రావాలన్న కోరిక ఉందేమో? ఆ కోరిక బయటపెట్టినా కాళ్లు విరగ్గొట్టేయాలనుకోవడం.. ఆ మాటను మీడియాతో కూడా చెప్పడం ఆశ్చర్యమే.

Like Us on Facebook : https://www.facebook.com/Tupakidotcom/