సంజ‌య్‌ ద‌త్‌ కి ప‌రాభ‌వం

సంజ‌య్‌ ద‌త్ జీవిత క‌థ‌తో తెర‌కెక్కిన `సంజు` వ‌స్తోందంటే దేశం మొత్తం దాని గురించే మాట్లాడుకుంది. వివాదాల క‌థానాయ‌కుడి జీవితాన్ని ఎలా చూపించారో అన్న క్యూరియాసిటీతో జ‌నం థియేట‌ర్ల‌కి వెళ్లారు. ఆ సినిమాకి బ్ర‌హ్మ‌ర‌థం ప‌ట్టారు. బాలీవుడ్ చ‌రిత్ర‌లో హ‌య్య‌స్ట్ గ్రాస‌ర్‌ గా నిలిచిన చిత్రాల్లో నాలుగో స్థానం `సంజు`కి ద‌క్కింది. ఆ సినిమా వెన‌క స్టార్ హీరో ర‌ణ్‌ బీర్ కపూర్‌ - స్టార్ ద‌ర్శ‌కుడు రాజ్‌ కుమార్ హిరాణీ ఉన్న‌మాట నిజ‌మే. కానీ... సంజ‌య్ జీవితం కూడా ఈ చిత్రానికి ఆస‌క్తిక‌రమైన అంశం అయ్యిందన‌డంలో ఎలాంటి సందేహం లేదు. అయితే ప్రేక్ష‌కులు సంజ‌య్‌ ద‌త్ జీవితం గురించి తెలుసుకొన్నారు

కానీ... ఆయ‌న‌కి మాత్రం ఈ సినిమాతో ఎలాంటి క్రేజ్ రాలేద‌నే విష‌యం తాజాగా రుజువైంది. సంజ‌య్ ద‌త్ బ‌యోపిక్ సంచ‌ల‌నాలు సృష్టిస్తూ రికార్డు స్థాయిలో క‌లెక్ష‌న్లు సాధిస్తే... ఆయ‌న క‌థానాయ‌కుడిగా న‌టించిన `సాహెబ్ బివి ఔర్ గ్యాంగ్‌ స్ట‌ర్ 3` మాత్రం డిజాస్ట‌ర్‌ గా బాలీవుడ్ రికార్డుల్లోకి ఎక్కింది. ఈనెల 27వ తేదీన విడుద‌లైన ఈసినిమాపై మేక‌ర్స్ చాలా న‌మ్మకాలే పెట్టుకొన్నారు. `సంజు` సినిమా క్రేజ్ సంజ‌య్‌ ద‌త్ సొంతంగా న‌టించిన మా చిత్రంపై కూడా ప‌డుతుంద‌ని - క‌చ్చితంగా మంచి వ‌సూళ్లే వ‌స్తాయ‌ని ఆశించారు. కానీ అదేం జ‌ర‌గ‌లేదు. ఫ‌స్ట్ వీకెండ్‌ లో కేవ‌లం రూ: 5 కోట్లు నెట్ వ‌సూళ్లు మాత్ర‌మే ఆ సినిమా కొచ్చాయని చిత్ర‌వ‌ర్గాలు తెలిపాయి. ఇది ఒక‌ర‌కంగా సంజ‌య్‌ ద‌త్‌ కి ప‌రాభ‌మే అనుకోవాలి.