‘మంచి మహరాజు’గా బ్యాడ్ బాయ్

అక్రమ ఆయుధాల కేసులో నేరస్థుడిగా రుజువై జైలు శిక్ష కూడా అనుభవించడం ద్వారా ‘బ్యాడ్ బాయ్’ ఇమేజ్ తెచ్చుకున్నాడు సంజయ్ దత్. ఇప్పుడతను ‘మంచి మహరాజు’గా కనిపించబోతున్నాడు. సంజయ్ దత్ హీరోగా ‘ది గుడ్ మహరాజా’ అనే సినిమా తెరకెక్కబోతుండటం విశేషం. బ్రిటిష్ కాలంలో స్వతంత్ర రాజ్యంగా ఉన్న నవనగర్ ప్రాంతాన్ని పాలించిన జామ్ సాహిబ్ దిగ్విజయ్ సింగ్ జీ రంజిత్ సింగ్ జీ పాత్రను ఈ చిత్రంలో సంజయ్ దత్ పోషించనుండటం విశేషం.

భారత దేశపు గొప్ప రాజుల్లో ఒకడిగా జామ్ సాహిబ్ పేరు తెచ్చుకున్నాడు. ఈ చారిత్రక కథను ‘మేరీ కోమ్’ దర్శకుడు ఒమంగ్ కుమార్ తెరకెక్కించనున్నాడు. ఈ చిత్ర ఫస్ట్ లుక్ కూడా లాంచ్ చేశారు. రాజు అవతారంలో సంజయ్ దత్ బాగానే కనిపిస్తున్నాడు. ఈ సినిమా ఇంగ్లిష్ భాషలో తెరకెక్కనుందట. జామ్ సాహిబ్ గురించి చదివి చాలా ఇన్ స్పైర్ అయ్యానని.. ఒక గొప్ప కథతో ఈ సినిమా తెరకెక్కుతోందని ఒమంగ్ కుమార్ చెప్పాడు.

సంజయ్ దత్-ఒమంగ్ కుమార్ కలిసి ఇప్పటికే ‘భూమి’ సినిమా చేస్తున్నారు. జైలు నుంచి విడుదలయ్యాక సంజయ్ నటించిన తొలి సినిమా అదే. ఈ మధ్యే రిలీజైన ‘భూమి’ ట్రైలర్ ప్రేక్షకుల్ని ఆకట్టుకుంది. ఒమంగ్ కుమార్ నిర్మాణంలో సంజయ్ దత్ ‘మలంగ్’ అనే మరో సినిమా కూడా చేస్తున్నాడు. ఆ చిత్రాన్ని ఆరంభ్ సింగ్ అనే కొత్త దర్శకుడు రూపొందిస్తున్నాడు. మరోవైపు సంజయ్ దత్ ‘సాహెబ్ బీవీ ఔర్ గ్యాంగ్ స్టర్-3’ సినిమాలోనూ నటిస్తున్నాడు.