మహేష్ బావ మళ్లీ వస్తున్నాడు

సూపర్ స్టార్ మహేష్ బాబుకి బావ అనగానే.. ఇప్పుడు సుధీర్ బాబు గుర్తుకొస్తున్నాడు. టాలీవుడ్ లో హీరో.. హిందీలో విలన్ రోల్స్ కారణంగా సుధీర్ బాగా ఫేమ్ సంపాదించుకున్నాడు. ఇక ఎంపీ గల్లా జయదేవ్ కూడా మహేష్ కి బావే. వీళ్లిద్దరూ కాకుండా మంజుల భర్త సంజయ్ స్వరూప్ కూడా ఉన్నాడు. నాని - ఏ మాయ చేశావే - ఆరంజ్ - బిజినెస్ మేన్ వంటి కొన్ని చిత్రాల్లో నటించాడు ఈ సూపర్ స్టార్ బావ.

అటు యాక్టింగ్ తో పాటు ఇటు ప్రొడక్షన్ లోనూ అనుభవం ఉన్న సంజయ్ స్వరూప్.. గత రెండేళ్లుగా నటనకు బ్రేక్ ఇచ్చాడు. అంత సీన్ లేదు అనే టైటిల్ పై 2014 వచ్చిన మూవీ తర్వాత వేరే సినిమాను ఒప్పుకోలేదు. ఇప్పుడు మళ్లీ ఓ సూపర్బ్ రోల్ తో ఆడియన్స్ ముందుకు వస్తున్నాడు సంజయ్. విజయ్ దేవరకొండ హీరోగా రూపొందుతున్న అర్జున్ రెడ్డి మూవీలో ఓ మంచి రోల్ ని చేస్తున్నట్లు తెలుస్తోంది.

అర్జున్ రెడ్డి మూవీలో స్టోరీకి చాలా కీలకమైన పాత్రను చేస్తున్నాడీయన. ఇప్పటివరకూ ఈయన చేసిన సినిమాలన్నిటిలో.. ఇదే అత్యంత భారీ రోల్ అనే మాట వినిపిస్తోంది. సందీప్ వంగ అనే కొత్త దర్శకుడు అర్జున్ రెడ్డిని తెరకెక్కిస్తుండగా.. సిటీ బేస్డ్ గా సాగే లవ్ స్టోరీని చూపించబోతున్నారు. రీసెంట్ గా లిప్ కిస్ ప్రాక్టీస్ పై మేకింగ్ వీడియో ఇచ్చి సంచలనం సృష్టించిన ఈ సినిమాకి.. ఈ నెల 20 నుంచి నెక్ట్స్ షెడ్యూల్ షూటింగ్ ప్రారంభం కానుంది.