సంజు రొమాన్స్ భలేగుందిలే

సంజు అంటూ సంజయ్ దత్ బయోపిక్ తెరకెక్కింది. అలనాటి హీరో సంజయ్ దత్ పాత్రలో బాలీవుడ్ యంగ్ స్టార్ హీరో రణబీర్ కపూర్ నటిస్తున్న ఈ మూవీపై.. ట్రైలర్ రిలీజ్ అయినప్పటి నుంచి అంచనాలు అమాంతం పెరిగిపోయాయి. పీకే.. త్రీఈడియట్స్ వంటి సినిమాలను రూపొందించిన రాజ్ కుమార్ హిరాణి దర్శకత్వం వహించడం అసలు సిసలైన అట్రాక్షన్ పాయింట్ గా నిలుస్తోంది.

ఈ సినిమాను జూన్29న రిలీజ్ కు షెడ్యూల్ చేయగా.. ఇప్పటికే ప్రమోషన్ పనులు ఫుల్ స్పీడ్ లో సాగుతున్నాయి. తాజాగా సంజు నుంచి ఫస్ట్ సింగిల్ ను రిలీజ్ చేశారు. 1980ల కాలం నాటి రొమాన్స్ ను చూపించిన విధానం బాగుంది. మై బఢియా.. తూ హీ బఢియా అంటూ సాగే పాటలో ఫిమేల్ వాయిస్ కు తగినట్లుగా లిప్ సింక్ చేస్తూ.. మిమిక్రీ చేస్తున్న తరహాలో పాట సాగుతుంది. అప్పటి సంజయ్ దత్ ను అచ్చుగుద్దినట్లు దింపేస్తూ రణబీర్ కపూర్ చేసిన యాక్టింగ్ ఆకట్టుకుంటుంది.

మరోవైపు.. పాటలో సోనమ్ కపూర్ తో రణబీర్ రొమాన్స్ చేయడం కూడా కనిపిస్తుంది. 3 దశాబ్దాలకు పూర్వం సినిమాల్లో కనిపించిన రొమాన్స్ స్టైల్ ను మళ్లీ చూపించడం విపరీతంగా అట్రాక్ట్ చేస్తుంది. బయోపిక్ కావడంతో పీరియాడిక్ ఫిలిం మాదిరిగా పలు కాలాలను చూపించాల్సి ఉంటుంది. అందుకు తగినట్లుగా దర్శకుడు చేసిన పిక్చరైజేషన్ సూపర్ అనాల్సిందే.