రూటు మార్చిన స‌ప్త‌గిరి!

తెలుగు సినిమా స్టార్ క‌మెడియ‌న్ల‌కు కాస్త క్రేజు రాగానే బుర్ర‌లో వారికి హీరో పురుగు ముడుతోంది. దీంతో చ‌ల్ల‌గా సాగుతున్న కెరియ‌ర్‌ లో ప్రయోగాలు మొద‌లుపెడ‌తారు. కొంద‌రు వెనక్కు రాలేక గిజ‌గిజ కొట్టుకుంటూ ఉంటే... ఇంకొంద‌రు రెండింటినీ బ్యాలెన్స్ చేసుకుంటూ ఉంటారు. 2000 ఏడాదికి ముందు క‌మెడియ‌న్లు తమ స్థానాన్ని నిల‌బెట్టుకోవ‌డానికి ప్ర‌య‌త్నించే వారే త‌ప్పించి ప‌క్క చూపులు చూసేవారు కాదు. కానీ ఆ త‌ర్వాత స్టార్స్ అయిన‌ చాలా మంది క‌మెడియ‌న్లు ఎపుడెపుడు హీరో అవుదామా అన త‌హ‌త‌హ‌లాడారు. అలాంటి వారిలో స‌ప్త‌గిరి ఒక‌రు. ఇప్ప‌టికే 3-4 సినిమాలు హీరోగా చేసినా ఏవీ పెద్ద హిట్ట‌యిన దాఖ‌లాలు లేవు. ఒక‌ట్రెండు ఖ‌ర్చును తిరిగి తెచ్చాయి. అయితే, హీరో అయినా తాను ఇంకా క‌మెడియ‌న్ క్యారెక్ట‌ర్లు వ‌దులుకోక‌పోవ‌డ‌మే అత‌డు చేసిన మంచిప‌ని.

తాజాగా స‌ప్తగిరి హీరోగా మ‌రో సినిమా వ‌స్తోంది. టైటిల్‌... గజదొంగ. అయితే, ఇది తొలి రెండింటిలా కామెడీ జానర్ కాక‌పోవ‌డం సాహ‌స‌మ‌నే చెప్పాలి. పైగా క్లిష్ట‌మైన యాక్షన్‌ ఎంటర్‌టైనర్ క‌థ‌ను ఎంచుకున్నారు. గీతా ఆర్ట్స్ - సూప‌ర్ గుడ్ ఫిలిమ్స్ సంస్థల్లో ద‌ర్శక‌త్వ శాఖ‌లో ప‌నిచేసిన డి.రామ‌కృష్ణ అనే కొత్త దర్శకుడు ఈ సినిమాను చేస్తుండ‌టం మ‌రో సాహసం.

అయితే, గ‌జ‌దొంగ అన‌గానే ఎన్టీఆర్ ‘గ‌జ‌దొంగ’ గుర్తొస్తుంది అంద‌రికీ. ఈ విష‌యం ముందే అర్థ‌మైన‌ట్టుంది వాళ్ల‌కు. అందుకే ... దానికి దీనికీ సంబంధం లేద‌హో అని ప్ర‌క‌టించేశారు నిర్మాత‌లు. ఇందులో స‌ప్తగిరి దొంగ‌ల‌కు దొంగ‌. దొంగ‌ల‌తో ఒక టీం త‌యారుచేసి స‌మాజాన్ని ఉద్ద‌రించే మంచిదొంగ‌ట‌. ఇంకా ఆగ‌స్టులో ఈ సినిమా మొద‌లవుతుందంటున్నారు. ప్రీ ప్రొడ‌క్షన్ నుంచి పబ్లిసిటీ మొద‌లుపెట్టేశారు. మ‌రి సినిమా కంటెంట్ విష‌యంలో కూడా జాగ్ర‌త్త ప‌డితే మంచిది. ఈ మ‌ధ్య‌నే ఒక టాలీవుడ్ చ‌రిత్ర‌లోనే ఒక భారీ డిజాస్ట‌ర్ లో క‌నిపించారు. డెరెక్ట‌రు - హీరో పాపులర్ అయినా... స‌ప్త‌గిరి సీన్లు ప‌డినా అది జ‌నాల‌కు గుర్తుకూడా లేదు. ఒక్క రోజులో థియేట‌ర్ల నుంచి లేచిపోయింది. ఆ ట్రాజెడీ స‌ప్త‌గిరికి మైన‌స్ కాక‌పోవ‌చ్చు గాని... ఇపుడు చేస్తున్న‌ది యాక్ష‌న్ సినిమా. చాలా జాగ్ర‌త్త అవ‌స‌రం సుమా!