సప్తగిరికి ఈసారి ఎలాగో?

గత కొన్నేళ్లలో చాలామంది కమెడియన్లు హీరోలయ్యారు. వాళ్లలో సక్సెస్ అయింది కొద్దిమందే. సునీల్‌ కు మంచి ఆరంభం దక్కినా అతను సద్వినియోగం చేసుకోలేకపోయాడు. మాస్ ఇమేజ్ కోసం వెంపర్లాడి ఉన్న మార్కెట్ మొత్తం కోల్పోయాడు. మరోవైపు శ్రీనివాసరెడ్డి హీరోలా కాకుండా ఒక పాత్రధారిగా కనిపించే సినిమాల్ని తెలివిగా ఎంచుకుంటూ విజయవంతమవుతున్నాడు. వీళ్లిద్దరి తర్వాత కమెడియన్ టర్న్ డ్ హీరోల్లో ఎక్కువమంది దృష్టిని ఆకర్షించిన నటుడు సప్తగిరి.

గత ఏడాది అతను ‘సప్తగిరి ఎక్స్ ప్రెస్’ సినిమాతో హీరోగా పరిచయమయ్యాడు. కంటెంట్ పరంగా ఈ సినిమాలో అంత విశేషాలేమీ లేవు. ఐతే ఈ సినిమా నిర్మాతకు.. బయ్యర్లకు మంచి ఫలితమే తెచ్చిపెట్టింది తక్కువ బడ్జెట్లో సినిమా పూర్తి చేయడం.. పవన్ కళ్యాణ్ ఆడియో రిలీజ్ చేయడం.. తర్వాత కూడా ప్రమోషన్లకు పవన్ పేరును వాడుకోవడంతో దీనికి ఓపెనింగ్స్ బాగానే వచ్చాయి. నిర్మాత రవికిరణ్ సేఫ్ అయిపోయాడు.

దీంతో అదే నిర్మాత మళ్లీ సప్తగిరిని పెట్టి ‘సప్తగిరి ఎల్ఎల్బీ’ సినిమాను నిర్మించాడు. సప్తగిరి తొలి సినిమా లాగే ఇది కూడా రీమేకే. హిందీ నుంచి ‘జాలీ ఎల్ ఎల్బీ’ హక్కులు తీసుకుని బాగా మసాలా అద్దినట్లున్నారు. ఐతే హీరోగా సప్తగిరి తొలి సినిమాకు పవన్ కలిసొచ్చాడు. ఓపెనింగ్స్ కూడా వచ్చాయి. కానీ మళ్లీ అదే మ్యాజిక్ రిపీటవుతుందా అన్నది చూడాలి. ఈ సినిమాకు కూడా రామ్ చరణ్.. నాని.. సుకుమార్ లాంటి ప్రముఖుల సపోర్ట్ తీసుకున్నాడు సప్తగిరి. పైగా పోటీ లేని టైంలో సినిమా రిలీజవుతుండటం కలిసొచ్చే అంశం. మరి గురువారం రిలీజవబోతున్న ఈ చిత్రానికి వసూళ్లెలా ఉంటాయో.. ఈ చిత్రంపై క్రిటిక్స్ ఒపీనియన్ ఎలా ఉంటుందో చూడాలి.