సర్దార్ వాయిదా.. ఛాన్సే లేదు

సర్దార్ గబ్బర్ సింగ్ విడుదల తేదీకి ఇంకో 20 రోజులే మిగిలుంది. ఐతే ఇంకా షూటింగ్ ఇంకా పూర్తవలేదు అంటున్నారు. నిర్మాణాంతర కార్యక్రమాలు కూడా మిగిలే ఉన్నాయి. మరి అనుకున్నట్లే ఏప్రిల్ 8న సినిమా వస్తుందా రాదా అన్న సస్పెన్స్ కొనసాగుతూనే ఉంది. ఐతే ఆరునూరైనా ఆ రోజు సినిమాను విడుదల చేయాల్సిందే అని పవన్ అండ్ కో చాలా పట్టుదలగా ఉంది. వారం రెండు వారాలు వాయిదా పడ్డా పర్వాలేదు అనుకునే పరిస్థితి లేదు. ఎందుకంటే ఇక్కడో మెలిక ఉంది. ‘సర్దార్..’ తెలుగుతో పాటు హిందీలోనూ భారీ లెవెల్లో విడుదలవుతున్న సంగతి తెలిసిందే.

ఐతే హిందీలో వారం తర్వాత.. అంటే ఏప్రిల్ 15న షారుఖ్ ఖాన్ సినిమా ‘ఫ్యాన్’ భారీ స్థాయిలో విడుదలవుతోంది. కింగ్ ఖాన్ సినిమా అంటే ఆ హంగామా ఎలా ఉంటుందో ప్రత్యేకంగా చెప్పాల్సిన పని లేదు. ఉత్తరాదిన థియేటర్లన్నీ ఈ సినిమాతోనే నిండిపోతాయి. రెండు వారాల వరకు ఖాళీ ఉండదు. కాబట్టి ‘సర్దార్..’కు ఏప్రిల్ 8న రావడం తప్ప వేరే మార్గం లేదు. పైగా హిందీలో ఒక డేట్ ఇచ్చి, థియేటర్లు బుక్ చేసేశాక.. మళ్లీ మార్చడానికి కూడా కుదరదు. కాబట్టి ఏం చేసైనా సరే.. ఏప్రిల్ 8న ‘సర్దార్..’ను రిలీజ్ చేసి తీరాల్సిందే. ప్రస్తుతం రామోజీ ఫిలిం సిటీలో టైటిల్ సాంగ్ చిత్రీకరిస్తున్న యూనిట్.. ఈ నెల 20న ఆడియో వేడుక తర్వాత మిగిలిన రెండు పాటల కోసం యూరప్ వెళ్లనుంది. వారం తర్వాత ఇండియాకు వచ్చి మిగతా కార్యక్రమాలు పూర్తి చేయబోతున్నారు.