సర్దార్ సంక్రాంతికి రావట్లేదు!!

ఈ సారి సంక్రాంతి రేస్ భలే రంజుగా ఉంటుందని ముందునుంచి అంచనాలు ఉన్నాయి. పవన్ కళ్యాన్ సర్దార్ గబ్బర్ సింగ్ - ఎన్టీఆర్ నాన్నకు ప్రేమతో - మహేష్ బ్రహ్మోత్సవం - త్రివిక్రమ్ అ.. ఆ..లను సంక్రాంతికి షెడ్యూల్ చేశారు. ఈ టార్గెట్ ను అందుకోవడానికి.. జెట్ స్పీడ్ లో షూటింగ్ కూడా ప్లాన్ చేసుకున్నారు మేకర్స్. అయితే.. ఈ రేస్ నుంచి పవన్ కళ్యాణ్ తప్పుకున్నాడు ఇప్పుడు.

ప్రారంభమే స్లోగా ఉన్న సర్దార్ కి.. సినిమాటోగ్రాఫర్ జయనన్ విన్సెంట్ వివాదం తర్వాత మరింత ఆలస్యం జరిగింది. దీంతో పవన్ - డైరెక్టర్ బాబీల అంచనాలకు తగ్గట్లుగా షూటింగ్ జరగడం లేదు. సంక్రాంతి కోసం హడావిడిగా కంప్లీట్ చేయాలని బాబీ అనుకున్నా.. అంత కంగారేం పడక్కర్లేదు.. అవసరమైతే సమ్మర్ కి రిలీజ్ చేద్దామని పవన్ భరోసా ఇచ్చాడట. దీంతో దర్శకుడు కూడా స్పీడ్ కంటే క్వాలిటీ పైనే దృష్టి పెట్టడం మొదలుపెట్టాడు. ఇప్పుడు షూటింగ్ జరుగుతున్న పేస్ చూస్తే.. సంక్రాంతికి రావడం అసంభవం అని యూనిట్ వర్గాలకు అర్ధమైపోయింది. కానీ నిర్మాత - దర్శకుడు మాత్రం దీనిపై ఎలాంటి అధికారిక ప్రకటనా చేయలేదు.

అప్పట్లో గబ్బర్ సింగ్ కూడా సమ్మర్ లోనే వచ్చి సందడి చేశాడు. మళ్లీ ఇప్పుడు సర్దార్ గబ్బర్ సింగ్ కూడా ఇంకో సమ్మర్ కే రానుంది. ఏమైనా ఆ సీజన్ కు పవన్ కు కలిసొచ్చే విషయమే. ఇప్పటికే కెవ్వుకేకని మించిన ఓ మాంచి మాస్ బీట్ కూడా దేవిశ్రీ ఇచ్చాడట. కాజల్ తొలిసారిగా పవన్ కళ్యాణ్ తో నటిస్తున్న సర్దార్.. ప్రస్తుతం హైద్రాబాద్ లో షూటింగ్ జరుపుకుంటోంది.