ఐతే.. పవన్ అభిమానులకు పండగేనన్నమాట

పవన్ కళ్యాణ్ తెరమీద కనిపిస్తే చాలు.. ఆయన అభిమానులు కుదురుగా ఉండలేరు. ఇక గబ్బర్ సింగ్ తరహాలో ఫ్యాన్స్ కోసమే తీసిన ఎంటర్ టైనర్స్ అయితే.. ఇక సందడి ఎలా ఉంటుందో చెప్పాల్సిన పని లేదు. ఆ సినిమాకు పవన్ అభిమానులు ఎంజాయ్ చేసినట్లుగా ఇంకే సినిమాకూ చేసి ఉండరేమో. అందులోని ప్రతి డైలాగ్.. ప్రతి పాటా అభిమానుల్ని ఉర్రూతలూగించాయి. తన అభిమానులు తన నుంచి ఏం ఆశిస్తారన్నది కూడా పవన్ కు ఆ సినిమాతో బాగా అర్థమైంది. అందుకే ఆ తర్వాత తనే చాలా శ్రద్ధ పెట్టి మరీ గబ్బర్ సింగ్-2కి స్క్రిప్టు రాశాడు. రచయితలతో దానికి మెరుగులు దిద్దించాడు.

‘సర్దార్ గబ్బర్ సింగ్’కు సంబంధించి ప్రతి అంశం కూడా గబ్బర్ సింగ్ కంటే ఇంకా బెటర్ గా ఉండేలా తీర్చిదిద్దుతున్నట్లు.. ముఖ్యంగా పవన్ తన అభిమానుల్ని దృష్టిలో ఉంచుకుని ప్రతి చిన్న విషయంపైనా ఫోకస్ పెడుతున్నట్లు యూనిట్ సభ్యులు చెబుతున్నారు. తాజాగా ‘సర్దార్ గబ్బర్ సింగ్’ టైటిల్ సాంగ్ చిత్రీకరిస్తున్నారట. ఇది పవన్ సినిమాల్లోనే అత్యంత భారీ ఇంట్రడక్షన్ సాంగ్ అని చెబుతున్నారు. భారీగా డ్యాన్సర్లు.. భారీ సెట్టింగ్.. ఇలా అంతా కూడా ఓ రేంజిలో తీస్తున్నారట ఆ పాటను. గబ్బర్ సింగ్ టైటిల్ సాంగ్ కంటే కూడా ఇది సూపర్బ్ గా వస్తోందని చెబుతున్నారు. ఈ పాటతో థియేటర్లు ఊగిపోవడం ఖాయమంటున్నారు. దేవిశ్రీ ప్రసాద్ అదిరిపోయేలా.. అభిమానులు షేకైపోయేలా ఈ పాటను ట్యూన్ చేశాడట. ఈ సినిమాకు గిటారిస్టుగా పని చేసిన కెబా జెరమియా కూడా ట్విట్టర్ లో ఈ పాట గురించి ప్రత్యేకంగా ప్రస్తావించారు. సర్దార్ గబ్బర్ సింగ్ కోసం ఎలక్ట్రిక్ గిటార్ ట్రాక్ ఇచ్చాను. సూపర్ హెవీ ట్రాక్’’ అని ఈ పాట గురించి చెప్పారు. కాబట్టి ఈ పాటతో పవన్ అభిమానులకు పండగేనన్నమాట.