ఫస్ట్ అని నమ్మించేందుకు కష్టపడుతున్న సరిలేరు!

ఎప్పటిలాగా ఈ సంక్రాంతి కూడా టాలీవుడ్ బాక్స్ ఆఫీసుకు సందడి తీసుకొచ్చింది. 'దర్బార్'.. 'ఎంత మంచివాడవురా' నిరాశపరిచినప్పటికీ 'సరిలేరు నీకెవ్వరు'.. 'అల వైకుంఠపురములో' రెండూ దుమ్ము దులిపాయి. అదనపు షోలు.. టికెట్ ధర పెంపుతో కలెక్షన్ల వర్షం కురిపించాయి. అయితే ఈ రెండు సినిమాలలో అల్లు అర్జున్ సినిమా 'అల వైకుంఠపురములో' పైచేయి సాధించింది. 'సరిలేరు నీకెవ్వరు' రెండవ స్థానంతో సరిపెట్టుకోవాల్సి వచ్చింది.

అయితే తమ సినిమా రెండవస్థానంలో ఉందనే విషయం 'సరిలేరు నీకెవ్వరు' టీమ్ ఏమాత్రం ఒప్పుకోవడం లేదు. కిందపడ్డా మాదే పైచేయి అన్నట్టుగా వ్యవహరిస్తూ తమ సినిమా ఘనతనను తామే తక్కువ చేసుకుంటున్నారు. నిజానికి 'సరిలేరు నీకెవ్వరు' తీసెయ్యదగ్గ సినిమా కాదు. మొదటి రోజు నుండి భారీ కలెక్షన్స్ వచ్చాయి. మిశ్రమ స్పందనతో కూడా మొదటి వారం కలెక్షన్స్ వర్షం కురిపించింది. అయితే 'అల వైకుంఠపురములో' సినిమా మెరుగైనది కావడంతో ప్రేక్షకులకు ఫస్ట్ ఛాయిస్ గా మారింది. ఇప్పటికీ 'సరిలేరు నీకెవ్వరు' డీసెంట్ కలెక్షన్స్ నమోదు చేస్తూ ఉంది.

కానీ తమ సినిమా సెకండ్ ప్లేస్ లో ఉందనే విషయం ఎకే ఎంటర్టైన్మెంట్స్ టీమ్ వారు మహేష్.. నమ్రతకు తెలియకుండా మ్యానేజ్ చేస్తున్నారనే టాక్ ఉంది. తమ చిత్రానికి ఆశించినంత రేంజ్ లో స్పందన రాలేదని. కలెక్షన్స్ కూడా ఆశించినంత లేవనే వాస్తవాన్ని చెప్పకుండా నెట్టుకొస్తున్నారట. అందుకే చీటికి మాటికి సక్సెస్ పార్టీలు ఇస్తూ కవర్ చేస్తున్నారట. ఈ ఆరు రోజుల్లో నాలుగు సక్సెస్ పార్టీలు జరిగాయంటే ఎకే టీమ్ ఎంత కష్టపడుతుందో మనం అర్థం చేసుకోవచ్చని ఫిలిం నగర్ లో గుసగుసలు వినిపిస్తున్నాయి.

పైకి వాస్తవం చెప్పుకోలేక లోలోపల మాత్రం మథన పడుతున్నారట. సెకండ్ ప్లేస్ లో ఉన్నప్పటికీ.. 'మొగుడు'.. 'బ్లాక్ బస్టర్ కా బాప్'.. అంటూ ఊదరగొట్టడం వల్ల 'సరిలేరు నీకెవ్వరు' పై ప్రేక్షకుల్లో నెగెటివిటీ ఏర్పడుతోందని కూడా అంటున్నారు. ఇది సరిలేరు టీమ్ గుర్తిస్తారో లేదో!