సరిలేరు రైలుభోగీల ప్రచారం భలే ఉందే

సూపర్ స్టార్ మహేష్ బాబు - అనిల్ రావిపూడి కాంబినేషన్లో తెరకెక్కుతున్న 'సరిలేరు నీకెవ్వరు' సంక్రాంతి సందర్భంగా జనవరి 11 న విడుదల కానుంది. దీంతో ప్రచారకార్యక్రమాలు జోరుగా సాగుతున్నాయి. టీజర్.. లిరికల్ సాంగ్స్.. పోస్టర్లతో 'సరిలేరు నీకెవ్వరు' టీమ్ సినిమాపై హైప్ పెంచుతోంది. 'సరిలేరు నీకెవ్వరు' టీజర్ ఒక్కసారిగా అంచనాలు భారీగా పెంచేసింది.

డిజిటల్ మీడియా ప్రమోషన్స్ మాత్రమే కాకుండా 'సరిలేరు నీకెవ్వరు' టీమ్ ఇతర మార్గాల ద్వారా కూడా ప్రచారకార్యక్రమాల జోరు పెంచారు. రైలుభోగీలపై 'సరిలేరు నీకెవ్వరు' పోస్టర్లతో అవుట్ డోర్ ప్రమోషన్స్ చేస్తున్నారు. ఆంధ్రప్రదేశ్.. తెలంగాణా నుంచి బెంగుళూరు.. చెన్నైకి వెళ్ళే నాలుగు ట్రెయిన్స్ పై పూర్తిగా 'సరిలేరు నీకెవ్వరు' పోస్టర్లతో బ్రాండింగ్ చేశారు. మహేష్ కొండారెడ్డి బురుజు దగ్గర నిలుచుని ఉండే ఇంటెన్స్ పోస్టర్.. విజయశాంతి తో కలిసి పొలంలో నడుస్తూ ఉన్న పోస్టర్.. హీ ఈజ్ సో క్యూట్ పాటలో మహేష్ బ్యాగ్ తగిలించుకుని ఉంటే వెనక రష్మిక డ్యాన్స్ వేస్తున్న పోస్టర్.. ఇలా అన్ని రకాల పోస్టర్లతో రైళ్ళను అందంగా ముస్తాబు చేశారు. ఈ రైలు ప్రమోషన్స్ లో మరో ప్రత్యేకత కూడా ఉంది. ఎందుకంటే 'సరిలేరు నీకెవ్వరు' లో ట్రెయిన్ ఎపిసోడ్ కీలకమైనది. అలాంటప్పుడు ఈ రైలు భోగీలపై పోస్టర్ల ప్రచారంతో 'సరిలేరు నీకెవ్వరు' మరింతగా ప్రేక్షకులకు చేరువ అవుతుందనడంలో ఏమాత్రం సందేహం లేదు.

ఈ సినిమాలో విజయశాంతి.. ప్రకాష్ రాజ్.. రాజేంద్రప్రసాద్.. సంగీత.. హరితేజ.. బండ్ల గణేష్.. వెన్నెల కిషోర్ ఇతర కీలక పాత్రల్లో నటించారు. దేవీ శ్రీప్రసాద్ ఈ సినిమాకు సంగీత దర్శకుడు. ఈ సినిమాను అనిల్ సుంకర - దిల్ రాజు - మహేష్ బాబు సంయుక్తంగా నిర్మించారు.